BP-Azerbaijan rəhbəri Beynəlxalq Neft və Qaz Hasilatçıları Assosiasiyasının sədri seçilib

BP şirkətinin Azərbaycan, Gürcüstan və Türkiyə üzrə regional prezidenti Qordon Birrell Beynəlxalq Neft və Qaz Hasilatçıları (OGP) tərəfindən həmin assosiasiyanın idarə komitəsinin sədri seçilib.

BР-Azerbaijan-ın məlumatında deyilir ki, o, bu vəzifəyə assosiasiyanın Avstraliyanın Brisben şəhərində keçirilmiş sonuncu illik baş yığıncağında seçilib.

Yan Mak-Donald (Chevron) və Mişel Konti (Total) Birrelin müavinləri seçilib.  Birrell həmçinin BP şirkətinin Azərbaycan, Gürcüstan və Türkiyə üzrə regional prezidenti vəzifəsində qalıb.

"2040-cı ilə qədər dünya əhalisinin mövcud 7 milyarddan 9 milyarda qədər artacağını nəzərə alaraq, bizim 35% əlavə enerjiyə ehtiyacımız olacaq ki, bunun da xeyli hissəsi İƏİT-nin (İqtisadi Əməkdaşlıq və İnkişaf Təşkilatı) üzvü olmayan ölkələrdə elektrik enerjisi və nəqliyyat üçün tələbatın ödənilməsinə lazım olacaq.

Həmin vaxt bərpa olunan enerji mənbələri və nüvə enerjisi sahəsinin də inkişaf edəcəyinə baxmayaraq, neft dünyada ən mühüm yanacaq növü olmaqda davam edəcək və təbii qaz isə kömürü üstələyərək dünyada ikinci ən mühüm enerji mənbəyinə çevriləcək”, -  deyə Birrel qeyd edib.

Onun sözlərinə görə, dünyanın ehtiyacını təmin etmək üçün quru və dəniz yataqlarında yetərincə neft və qaz ehtiyatları var.
 
OGP-nin üzvləri sırasına dünyanın aparıcı açıq səhmdar, özəl və dövlət neft və qaz şirkətləri, neft və qaz assosiasiyaları, kəşfiyyat və hasilat sahəsində xidmətlər göstərən iri şirkətlər daxildir. Dünya neftinin yarısından çoxu və təxminən dünyadakı qazın üçdə biri OGP üzvləri tərəfindən hasil edilir. .--12В--