BP-Azərbaycan-ın yeni rəhbəri kimdir?

2 noyabr 2012-ci ildə ВР şirkəti Qordon Birreli BP-Azərbaycan-ın prezidenti təyin edib. C-b Birrel kimdir?

BP-Azərbaycan-ın press-relizində deyilir ki, Qordon neft və qaz sahəsində geniş təcrübəyə malik bir peşəkardır. Onun BP-də hasilat və geoloji-kəşfiyyat sahəsində 26 il  rəhbərlik və əməliyyatlar üzrə təcrübəsi var. 

O, BP-yə 1986-cı ildə gəlib və karyerasının ilk dövrlərində o, Şimal Dənizindəki biznesin həm dəniz, həm də  qurudakı əməliyyatları, mühəndisliyi və rəhbərliyi üzrə  bir sıra vəzifələrdə çalışıb. Bu vəzifələri o, Manqus yatağı, Fortis Yatağı, Miller yatağının işlənməsi, Sullom Vou Terminalı və BP-nin mərkəzi mühəndislər təşkilatında icra edib. 

1999-cu ildə Qordon Londona dəyişilərək BP şirkətinin baş ofisində çalışıb.   Sonra o, Azərbaycana təyinat alaraq “Şahdəniz” layihəsinin işlənməsinin ilkin mərhələləri də daxil olmaqla buradakı geoloji-kəşfiyyat və qiymətləndirmə layihələrinə rəhbərlik edib.  

2001-ci ildən 2005-ci ilə qədər  Qordon Alyaska və Kanadada müvafiq olaraq icra bölümü və biznes bölümündə  BP-nin hasilat əməliyyatlarına rəhbərlik edib. 2005-ci ildə o, BP-nin Şimal dənizindəki yetkin yataqlarından hasilat üzrə biznesinə rəhbərlik edib – bu yataqlardan gündəlik hasilat təxminən 250 min barrel neft ekvivalenti olub. Bu müddət ərzində o həmçinin BP Ekploreyşn Opereytinq Kompani Ltd və Britoyl plc-nin direktorlarından biri olub.  

Daha sonra hasilat və geoloji-kəşfiyyat texnologiyaları üzrə vitse-prezident və hasilat və geoloji-kəşfiyyat bölümünün icra aparatının rəhbəri kimi vəzifələrdə çalışıb.  

2010-cu ilin sonlarından Qordon BP-nin hasilat bölümü üzrə texniki təhlükəsizlik və əməliyyat riski funksiyasına rəhbərlik edir. Bu vəzifədə o, BP-nin  dünyada əməliyyatlar apardığı regionların hər birində yerləşdirilmiş qruplardan ibarət ümumi bir qlobal heyətə rəhbərlik edir. Həmçinin sualtı quyular şirkətinin  direktorlarından biri olub. 

Qordon  hazırda Neft və Qaz İstehsalçılarının Beynəlxalq Assosiasiyası (NQİ) sədrinin müavinlərindən biridir. Bu təşkilat neft və qaz hasilatçılarının beynəlxalq ticarət  assosiasiyasıdır.    

O, yüksək ixtisaslı mühəndisdir və Mühəndis-layihə  və Texnologiya İnstitutunun üzvüdür.  

Qordonun Uorik Universitetindən magistr dərəcəsi (MBA) və Heriot-Uott Universitetindən (Edinburq) Elektrik və Elektronika Mühəndisliyi üzrə fəxri dərəcəsi var.

C-b Qordon evlidir, 3 oğlu var. --12D—