BVF Azərbaycana təskinlik verdi: 2013-cü ildə neftin barreli $100-dan baha olacaq

Məlumat verildiyi kimi, Azərbaycan hökuməti neftin barrelinin qiyməti $100 olmaqla 2013-cü il üçün dövlət büdcəsi layihəsini parlamentə təqdim edib. 

Bir il öncə 2012-ci ilin dövlət büdcəsində neftin barreli $80 götürülmüşdü. Amma bu ilin mayında dünya bazarlarında neft baha olduu üçün büdcəyə yenidən baxıldı və onun gəlirləri neftin barreli $100 hesablanaraq müəyyən edildi. Bu il  9 ayın yekunu üçün Azərbaycan neftinin orta ixrac qiyməti $114/barrel olub. 

Beynəlxalq Valyuta Fondunun yeni proqnozu Azərbaycan hökumətinin arzusu ilə üst-üstə düşdü: BVF analitiklərinə görə, 2013-cü ildə neftin barreli $100-dan baha olacaq. “Bunun nəticəsində 2012-ci ildə neft istehsal edən ölkələrin ticarət balansının müsbət saldosu $400 mlrd-a çatacaq”, - deyə BVF iki illik hesabatında bildirir. Hesabatdan çıxarışlar “Fayneneyşl tayms”ın 12 noyabr sayında verilib. 

Fondun analitiklərinin fikrincə, İraq, Əlcəzair, İran və Bəhreyn enerji resurslarından qazandıqlarından çox xərcləyirlər. BVF-yə görə, Yaxın Şərq və Şimal Afrika ölkələri daha sərt büdcə intizamına riayət etməli və dərin islahatlar aparmalıdırlar. 

Yaxın Şərq və Şimal Afrika regionunun iqtisadi artımı bu il  5,1% olacaq. 2013-cü ildə artım sürəti hasilat eyni səviyyədə qaldığı üçün 3,6%-ə düşəcək. 

Fars Körfəzi Ərəb Dövlətləri Əməkdaşlıq Şurasına daxil olan ölkələrin (Bəhreyn, Qətər, Küveyt, BƏƏ, Səudiyyə Ərəbistanı Oman) məcmu ÜDM artımı 2012-ci ildə 5,5%, 2013-cü ildə 3,7% olacaq. Bu, 2009-cu ildən ən aşağı göstəricidir. –12D—