Daşınmaz əmlakın icbari sığortası üzrə mükafatlar kəskin azalıb

İcbari Sığorta Bürosunun (İSB) üzvü olan sığorta şirkətləri 2016-cı ilin fevral ayında daşınmaz əmlakın istismarı ilə bağlı mülki məsuliyyətin icbari sığortası üzrə 755,887 min manat (mənfi 80%) məbləğində sığorta haqqı əldə ediblər. İSB-nin məlumatına görə, ötən ay Büro üzvləri bu sığorta növü üzrə 5,904 min sığorta müqaviləsi bağlayıblar. Bu, 2015-ci ilin analoji dövrünün göstəricisindən 56% azdır.

Fevralda bağlanmış müqavilələrin 64,01%-i yaşayış evləri və mənzillərin, 0,98%-i inzibati binaların, 35,01%-i digər daşınmaz əmlakın payına düşüb.

Daşınmaz əmlakın icbari sığortası hüquqi və fiziki şəxslərə məxsus tikililərə, yaşayış və qeyri-yaşayış sahələrinə, yaşayış evləri, binaları və mənzillərə, habelə dövlət əmlakına şamil edilir. Bununla yanaşı, elektrik naqillərində baş verən qısaqapanma, yanğın, partlayış, su və kanalizasiya sistemində qəzalar, təbii fəlakətlər və s. ilə bağlı olan faktlar sığorta hadisəsi hesab olunur.

Bakıda daşınmaz əmlakın sığorta məbləğinin maksimal həcmi 25 min manat, Gəncə, Naxçıvan və Sumqayıtda 20 min manat, digər yaşayış məntəqlərində 15 min manat təşkil edir. Tarif sığorta məbləğinin 0,2%-ni təşkil edir.

Azərbaycanda 13 sığorta şirkəti daşınmaz əmlakın icbari sığortası üzrə lisenziyaya malikdir. --17D—