Dəmir yolunda sərnişin daşınmasında ziyan 30%-ə yaxındır

Dəmir yolu nəqliyyatında sərnişin daşınması xərcləri bilet satışı gəlirlərindən 20-30% çoxdur. Amma «Azərbaycan Dəmir Yolları» QSC biletləri bahalandırmğı planlaşdırmır, deyə ADY Sərnişin daşımaları Departamentinin rəisi Elyar Muradov Turan-a bildirib.

Sərnişin daşınmasındakı ziyan ADY-nin başqa gəlirləri hesabına ödənilir.

Ötən ildən dəmir yolunda sərnişin daşınması tariflərini müəyyən etmək səlahiyyəti dövlət başçısının sərəncamı ilə ADY rəhbərliyinə verilib. Sonuncu dəfə dəmir yolunda gediş traiflərinə 2011-ci ilin yanvarında yenidən baxılıb.

Bakıdan qərb istiqamətində, eləcə də Bakı-Tbilisi marşrutu ilə sərnişin daşınması bayram günləri artır. Məsələn, ADY mətbuat xidmətinin məlumatına görə, 28 dekabrdan 4 yanvar 2016-cı ilə kimi ölkə daxilində hərəkət edən sərnişin qatarları və Bakı-Tbilisi sürət qatarı ilə  37380  nəfər sərnişin daşınıb.

Amma nəzərə almaq lazımdır ki, əks istiqamətdə qatarlar yarıboş qayıdır. Əgər adi rejimdə qərb istiqamətində hər gün 2 min sərnişin daşınırsa, bayram günləri bu göstərici 4,6 min nəfəri keçir. Ona görə 8 gün ərzində sərnişin qatarlarına əlavə 104 vaqon qoşulub.

Dövlətstatkoma görə, ölkədə sərnişinlərin dəmir yolu nəqliyyatında istifadəsi azalır. 2015-ci ilin 11 ayında ADY xidmətindən 1,7 mln nəfər istifadə edib. Bu, əvvəlki ilin eyni dövrü ilə müqayisədə 25,6 faiz azdır. Hələ bunu da nəzərə almaq lazımdır ki, 2015-ci ilin sentyabrından Bakı-Sumqayıt-Bakı xəttinə «Stadler Rail Group» şirkətinin istehsalı olan 3 ikimərtəbəli KİSS markalı qatar buraxılıb. Bu qatarlar sutkada iki istiqamətdə 20 reys həyata keçirir. Bu il qatarların sayı 5-ə çatacaq. 08B