Deputat: 'Bazarı valyutadəyişmə məntəqələri ilə doyuzdurmaq lazımdır'
Azərbaycanda yeni formada valyuta mübadilə məntəqələri formalaşdırılacaq. Bunu iyunun 5-də Mərkəzi Bankın (AMB) sədri Taleh Kazımov Milli Məclisin İqtisadi siyasət, sənaye və sahibkarlıq komitəsinin iclasında deyib.
AMB sədrinin sözlərinə görə, kiçik yox, institusional valyuta mübadilə şöbələrinin yaradılması nəzərdə tutulur.
Azərbaycanda 2016-cı ilə qədər valyuta mübadiləsi məntəqələri geniş fəaliyyət göstərirdi. 2015-ci ildə ölkədə dalbadal iki devalvasiya baş verdi və manat iki dəfədən çox dəyər itirdi. Onların fəaliyyətinə 2016-cı ilin əvvəlində son qoyuldu, lisenziyalar ləğv olundu. Bu addımların "Mübadilə şöbələrinin təşkili və mübadilə əməliyyatlarının aparılması Qaydaları"na əsasən atıldığı bildirildi. Həmin qaydaya əsasən, mübadilə şöbəsi bankın özünün, filial və ya şöbəsinin yerləşdiyi ərazi vahidində yaradılır. Hazırda valyutanı yalnız banklarda dəyişmək və ya almaq mümkündür.
Milli Məclisin İqtisadi siyasət, sənaye və sahibkarlıq komitəsinin üzvü Rüfət Quliyev "Turan"a deyib ki, 2015-2016-cı illərdə valyutadəyişmə məntəqələri sistemində çox böyük oyunlar gedirdi: "Həmin oyunlar bizim maliyyə sistemimizə ciddi ziyan vururdu. Buna görə də onların bağlanması ilə bağlı qərar qəbul edilib. Artıq iki dəfə devalvasiya olub və qorxu var idi ki, belə düzgün olmayan, nəzarətsiz valyuta satışı manatın dollara münasibətdə valyuta paritetinə mənfi təsir edə bilər".
Deputatın fikrincə, regionlarda bankların filialları və onların yanında valyutadəyişmə məntəqələri açılmalıdır: "Bu, artıq qaçılmaz ehtiyacdır, çünki ölkədə turizmin inkişafı ilə bağlı proqramlar var. İkincisi isə, ölkəmizin iqtisadi və maliyyə gücünə baxsaq, görərik ki, o artır. Onunla birlikdə valyuta ilə bağlı olan maliyyə dövriyyəsi də artır. Bundan əlavə, valyuta satışından hasil olan pul üzrə uzun illərdir müsbət saldomuz var. Bütün bunlar ona gətirib çıxarır ki, bazarı valyutadəyişmə məntəqələri ilə doyuzdurmaq lazımdır".
Valyutadəyişmə məntəqələrində valyuta kursuna gəlincə isə, deputat deyib ki, bunu dövlət, Mərkəzi Bank təyin etməlidir: "Bununla belə, valyutadəyişmə məntəqələri qazanc əldə etsinlər deyə, dəhlizlər yaratmaq lazımdır, amma onların valyuta məzənnələrini çökdürməsinə imkan verilməməlidir".
İqtisadçı Nazim Bəydəmirli isə AzadlıqRadiosuna açıqlamasında həmin məntəqələrin ləğv edildiyi 2016-cı ili belə xatırlayıb: "Məqsəd, guya, o idi ki, xaricə gedən valyuta axınının qabağını alsınlar. Əslində isə inhisarlaşma prosesi gedirdi".
O deyib ki, yeni açılacaq valyutadəyişmə məntəqələrinin banklardan asılı olub-olmayacağı məsələsi bir çox suallara aydınlıq gətirəcək: "Əgər banklar bu valyutadəyişmə məntəqələrini yenidən inhisarda saxlayacaqsa və valyuta mübadiləsi üçün lisenziyalar yalnız banklara veriləcəksə, bu, əlverişli olmayacaq".
İqtisadçının sözlərinə görə, mübadilə məntəqələri valyuta kursunu tələb-təklif əsasında müəyyən etməlidir: "Bizdə belə olmağın şansı, demək olar ki, yoxdur. Azərbaycanda valyuta kursu inzibati üsullarla təyin edildiyinə görə bunun heç bir əhəmiyyəti yoxdur, çünki valyuta mübadiləsi üçün 4 faizlik marja var. Yəni, banklar Mərkəzi Bank tərəfindən müəyyən edilən valyuta kursundan 4 faiz aşağı və ya yuxarı sata bilməz. Bu da inhisarçılığın əlamətidir".
-
- Cəmiyyət
- 6 İyun 2023 16:20
İqtisadiyyat
-
İqtisadiyyat Nazirliyində yerli istehsalın stimullaşdırılması və ixrac potensialının genişləndirilməsi yollarının araşdırılması məqsədilə iyulun 26-da qeyri-neft sənayesi sahibkarları ilə görüş keçirilib.
-
Azərbaycanın internet provayderləri “Aztelekom” və “Baktelekom” avqustun 15-də qiymət strukturunda böyük dəyişikliklər edəcək. Yeni tariflərə əsasən, minimum internet sürəti 100 Mbit/s-dək artacaq, Mbit/s-nin qiyməti 0,45 AZN-dən 0,25 AZN-ə enəcək. Müvafiq olaraq, ödəniş 100 Mbit/s üçün 25 AZN, 150 Mbit/s üçün 30 AZN, 250 Mbit/s üçün 36 AZN-ə uyğunlaşdırılacaq.
-
Müstəqil ekspertlər Azərbaycanın ticarət dövriyyəsinin və ödəniş profisitinin azalması səbəbindən öz valyutası manatın növbəti devalvasiyası ərəfəsində ola biləcəyini ehtimal edirlər. Gözlənilən iqtisadi düzəlişlər valyuta axınının azalması və neft hasilatının azalması fonunda baş verir.
-
Azərbaycanın Xarici İşlər Naziri Ceyhun Bayramov bu gün Azərbaycan Xarici İşlər Nazirliyində Somalinin Xarici İşlər və Beynəlxalq Əməkdaşlıq Naziri Əhməd Moallim Figi ilə görüşüb. Bu görüş, əvvəlki gün Figi ilə Azərbaycanın İqtisadiyyat Naziri Mikail Cabbarov arasında keçirilmiş müzakirələrdən sonra baş tutub.
Rəy yaz