Dövlət büdcəsinin xərcləri 2,3% azalıb

2014-cü ildə dövlət büdcəsinin gəlirləri 18,4 milyard manat, xərcləri isə 18,7 milyard manat təşkil edib.  Bu barədə yanvarın 10-da prezident İlham Əliyevin sədrliyi ilə keçirilən Nazirlər Kabinetinin iclasında iqtisadiyyat və sənaye naziri Şahin Mustafayev bildirib.

2014-cü ildə dövlət büdcəsinin xərcləri nəzərdə tutulandan 6.8% və ya 1,363 milyard manat az icra olunub. Ş. Mustafayevin sözlərinə görə, 2014-cü ilin xərcləri 18.7 milyard manat təşkil edib. Halbuki, 2014-cü ilin büdcə qanununda büdcənin xərcləri 20.063 milyard manat təsdiqlənmişdi. 

2014-cü ildə qeyri-neft sektorundan dövlət büdcəsinə daxilolmalar 19,5 faiz artıb. Regionların sosial-iqtisadi inkişafının uğurlu nəticəsi olaraq regionlardan vergi daxilolmaları 9,8 faiz artıb.

Ekspert Rövşən Ağayevin sözlərinə görə, son beş ildə, yəni, ilk iqtisadi böhran dövründən bu yana  ilk dəfə olaraq dövlət büdcəsinin xərcləri əvvəlki illərin büdcəsi ilə müqayisədə azaldılıb. 2013-cü illə müqayisədə xərclər 400 mln. manat və ya 2,3% azaldılıb. İqtisadçının fikrincə, hökumət büdcə xərclərinin azaldılmasının sosial-iqtisadi nəticələri barədə açıqlama verə bilərdi.

Ekspertlərin çoxu proqnozlaşdırır ki, xam neftin qiymətinin enməsi ilə əlaqədar 2015-ci ildə hökumət bir çox dövlət obyektlərinin maliyyələşdirilməsindən imtina edəcək.

Resurslar ilk növbədə Bakıda keçiriləcək Avropa Oyunlarına hazırlığa yönələcək.

2015-ci ildə büdcə xərclərinin (büdcə işçilərinin əmək haqları, pensiya və digər sosial ödənişlər) 25%-i müdafiə olunmuş qalır. Çox güman ki, hökumət dövlət büdcəsindən əlavə transfertlərə getməyəcək və “investisiya iştahası”nı azaltmayacaq. 08B