ƏDV-in 80%-i əcnəbilərə qaytarılacaq

Azərbaycanda əcnəbilərin xaricə aparılan mala görə ƏDV-in qaytarılması üzrə test rejimində TAX FREE sistemi tətbiq edilir.

Vergilər Nazirliyinin məlumatına görə, mexanizm haqqı ödənilən əmək fəaliyyəti ilə məşğul olmaq üçün iş icazəsi verilən əcnəbilərə və vətəndaşlığı olmayan şəxslərə; bilavasitə xidməti vəzifələrini icra edən hava nəqliyyatının heyət üzvü olan şəxslərə; yaşı 14-dən aşağı olan şəxslərə şamil edilmir.

Bir dəfəyə alınan malların qiyməti 300 manatdan çox olanda elektron hesab fakturadan istifadə etmək olar. Mallar alınandan sonra 90 gündən gec olmayaraq ölkədən çıxarılmalıdır. Yoxsa ƏDV geri qaytarılmır.

Satıcı pasport məlumatları daxil etdikdən sonra müştəriyə 2 nüsxədə imzalanmış və möhürlənmiş elektron vergi hesab-fakturası təqdim edəcək.   Elektron vergi hesab-fakturasında digər məlumatlarla yanaşı ödənilmiş ƏDV-nin məbləği və ƏDV-nin qaytarılacağı son tarix göstərilir.

Müştəri Azərbaycanı tərk etdiyi zaman vergi hesab-fakturasını,  malı, və pasportunu aeroportda yerləşən gömrük nəzarət buraxılış məntəqəsinə təqdim etməlidir.

ƏDV müştəriyə həm nağd, həm də nağdsız şəkildə qaytarıla bilər və ikinci halda bank rekvizitlərinin təqdim edilməsi anından 10 iş günü müddətində ödənilir.

ƏDV məbləğindən 20% xidmət ödənişi olaraq çıxılacaq, qalan məbləğ alıcıya qaytarılacaq. Testin aktuallığı «Formula-1» yarışlarına gələn turistlərin ticarətə cəlb edilməsi ilə bağlıdır. --17D