Əhalinin əmanətlərinin 93%-i Bakının payına düşür

 Paytaxtla regionlar arasında bank əmanətlərinin fərqi azalmır. AMB-nin məlumatına görə,1 oktyabr üçün əhalinin əmanətlərinin 93%-i Bakının payına düşür. Onların əmanətləri 6 mlrd 430 mln 8,7 min manatdır (ilin əvvəli ilə müqayisədə +8,2%). Orta faiz dərəcəsi 8,1%-dir.

Bakı sakinləri əmanətlərini milli valyuta ilə yatırmağa üstünlük verirlər. Milli valyuta ilə əmanətlərin payına 4 mlrd 14 mln 175,8 min manat və ya Bakı üzrə bütün əmanətlərin 62,4%-i düşür. Xarici valyuta ilə əmanətlərin payına 2 mlrd 415 mln. 832,9 min manat və ya Bakı üzrə bütün əmanətlərin 37,6%-i düşür.

Paytaxtda xarici valyuta ilə əmanətlər orta illik hesabla 8,8%, milli valyuta ilə 7,6% dərəcəsi ilə qəbul edilib.

Regionlarda vəziyyət başqadır. Banklar 529 mln 657,2 min manat cəlb edib. Bu, ilin əvvəlinə olan göstəricidən 11,4% çoxdur.

Regionlardan Abşeron iqtisadi rayonunun əhalisi pullarını banklarda saxlamağa daha çox üstünlük verir. 2014-cü il oktyabrın 1-ə üçün Abşeron iqtisadi rayonundakı banklarda əhalinin əmanətləri orta illik hesabla 8,6% dərəcəsi ilə 166 mln. 209,3 min manat təşkil edir.

Aran iqtisadi rayonunun sakinlərindən 160 mln 422,1 min manat (illik 7,6% dərəcəsi ilə) əmanət cəlb edilib. Banklar Gəncə-Qazax iqtisadi rayonunun sakinlərindən 57 mln 350 min manat (orta illik hesabla 5,8% dərəcəsi ilə) əmanət qəbul edib. Qalan əmanətlər respublikanın digər iqtisadi rayonlarının əhalisinin payına düşür. Regionlarda da əhali əmanətlərini milli valyuta ilə qoymağa üstünlük verir. --17D—