Əhalinin müddətli əmanətləri il ərzində dörddə bir artıb

2012-ci ilin dekabrında Azərbaycanın kredit təşkilatlarında depozit və əmanət həcmi 289,3 mln manat və ya 2,8% artaraq 10699,2 mln manat ($13,6 mlrd) olub.  Ötən ilin əvvəli ilə müqayisədə bu göstərici 1252,2 mln manat və ya 13,3% artıb. 2011-ci ildə bankların depozit portfeli 23,9% artmışdı.

Hesabat ayında manat və valyuta vəsaitləri artıb. Valyuta vəsaitlərinin həcmi 5636,7 mln olub, bankların ümumi depozit portfelində onların payı 52,6%-dək azalıb. Bir il əvvəl bu göstərici 54,7% idi.  

Hesabat ayında müddətli əmanətlərin ümumi həcmi 7073 mln manat və ya ümumi göstəricinin 66,1%-dək artıb. Əhalinin müddətli əmanətləri son 12 ayda 24,2%, dekabrda 8,7% artaraq 4070,6 mln manat olub. Fiziki şəxslərin müddətli əmanətləribankların depozit bazasında 38% (il ərzində + 3,3 f.b.) olub.

İlin əvvəli üçün fiziki şəxslər banklarda 5113,4 mln manat depozit və ya əmanət saxlayıblar. Bu, ümumi göstəricinin 47,8%-dir (bir ay əvvəl 45,8%). Fiziki şəxslərin qısamüddətli əmanətləri 3,5% artaraq 3132,6 mln manat təşkil edib. 

Azərbaycan Mərkəzi Bankının məlumatına görə, manat depozitləri və əmanətləri üzrə orta dərəcə dekabrda 0,05 f.b. azalaraq 9,99%, xarici valyuta ilə əmanətlərdə 0,11 f.b. azalaraq 10,18% olub. İllik müddətdə birincilər 0,27 f.b., ikincilər 0,93 f.b. azalıb. Hesabat ayında manat depozitləri əhalidən orta hesabla illik 10,25%, valyuta depozitləri 10,75%-lə qəbul edilib. Hüquqi şəxslər üçün bu göstərici 6,95% və 3,69% olub. --15В--