Ekspert logistika və ticarətin inkişafına dair Yol Xəritəsi haqqında – yeni heç nə yoxdur

Bakı/17.02.17/Turan: Logistika və ticarətin inkişafına dair Yol Xəritəsində yeni heç nə yoxdur, deyə iqtisadçı Əkrəm Həsənov bildirib.

Ə.Həsənov Facebook səhifəsində yazıb ki, sənəddə son illərdə bəyan edilən hədəflər cəm halında izah edilib.

«Bütövlükdə bu Xəritə ölkəmizin coğrafi vəziyyəti, mövcud nəqliyyat qovşaqları və dəhlizlərindən necə yararlanması barədədir», deyə o bildirib.

Ekspert bildirir ki, xəritədə tranzit ticarət həcmini artırılması, azad ticarət zonasının fəaliyyətinin təşkili, logistika və ticarət mərkəzlərinin yaradılması, Şərq-Qərb və Şimal-Cənub dəhlizləri üzrə yükdaşımaların artırılması, Ələtdə yeni liman kompleksinin, Bakı-Tbilisi-Qars və Astara-Astara dəmir yolu layihələrinin tamamlanması və s indiyədək deyilənlər təkrar edilir.

Ə.Həsənov qeyd edib ki, xəritəyə əsasən bunlara nail olmaq üçün işçi qruplar yaradılacaq, normativ baza təkmilləşdiriləcək, xarici ekspertlərlə əməkdaşlıq ediləcək, investisiya planları işlənəcək.

Onun sözlərinə görə, Azərbaycan praktikasında bu, xarici qanunların köçürülməsi, məmurların çoxsaylı xarici ezamiyyətləri deməkdir.

«Bütün bunlara 3,16 mlrd. manat vəsait xərclənəcək», deyə o bildirib. –71D-