Elektrik qatarları yenidən qaytarılır

I Avropa Oyunları zamanı (12-28 iyun) Bakı sərnişin vağzalı və “Koroğlu” metro stansiyası arasında elektrik qatarı işləyəcək. Bu barədə “Azərbaycan Dəmir Yolları” QSC-nin rəhbəri Cavid Qurbanov jurnalistlərə bildirib.

Metro və xüsusi avtobus xətləri ilə yanaşı elektrik qatarları   sərnişinlərin Olimpiya stadionu, “Atletlər kəndi” və Milli Gimnastika Arenasına çatdırılmasında daha bir nəqliyyat vasitəsi olacaq.

Qeyd edək ki, “Koroğlu” metro stansiyasının yaxınlığında elektrik qatarı üçün dayanacaq var.

“8-ci km. qəsəbəsi” adlanan bu stansiya nəqliyyat qovşağı kimi öz önəmini beş il əvvəl itirib. Belə ki, Abşeronda dairəvi xətt üzrə qatarların hərəkəti və  bir çox elektrik qatarları reysləri ləğv edilib.

C.Qurbanov Böyük Bakı regional inkişaf layihəsi çərçivəsində (cənubda Ələt qəsəbəsi ərazisindən şimalda Sumqayıta qədər) şəhərətrafı qəsəbələrə də qatarların hərəkətinin bərpasına dair planlardan danışıb.

Belə ki, iyunda Bakı-Xırdalan-Sumqayıt dəmir yolunun yenidən qurulmasının başa çatdırılması planlaşdırılır. Bunun sayəsində həmin marşrut  üzrə qatarların hərəkət sürəti paytaxtdan Sumqayıta qədər cəmi 40 dəqiqə təşkil edəcək. Xəttə İsveçrədən alınmış kondisioner, WiFi-İnternetlə təchiz olunmuş qatarlar buraxılacaq.

Bundan əlavə, 1-1,5 il ərzində Bakı-Böyük Kəsik dəmir yolu ilə qatarların maksimum hərəkət sürəti təxminən 120 km/s-ə (hazırda 60-70 km./s) çatdırılacaq. Bu, Bakı və Gəncə arasında elektrik qatarları yolunun beş saatadək azaldılmasına imkan verəcək.–06D