Elman Rüstəmovun bəyanatlarına inanmaq olarmı?

«Bank Standart»ın bağlanması yenidən Elman Rüstəmovun bəyanatlarına etimad məsələsini gündəliyə gətirib.

Xatırladaq ki, «Bank Standart»ın bağlanmasından 4 gün əvvəl, yəni sentyabrın 26-da Elman Rüstəmov bəyan etmişdi ki, Maliyyə Nazirliyi və Maliyyə Bazarlarına Nəzarət Palatası bankın strateji sabitliyi planı üzərində işləyir.

Onun sözlərinə görə, bank hökumətdən mühüm likvidlik əldə edib. O, bəyan edib ki, bankdakı böhran aradan qaldırılıb, AMB Maliyyə Nazirliyi və Maliyyə Bazarlarına Nəzarət Palatası ilə birgə bankın sağlamlaşdırılması planı üzərində çalışır.

Təəccüblüdür, baş bankir planlaşdırılan qərardan necə xəbəsiz olub və ya maliyyə sektorunda qərar qəbulunda mühüm fiqur olan şəxs yalan informasiyanı necə verə bilib?   

Bank eksperti Əkrəm Həsənov Turan-a müsahibəsində deyib ki, «Bank Standart» bağlanana qədər də Elman Rüstəmovun bəyanatlarına etimad yox idi.

«Hadisələr göstərir ki, onun proseslərə təsiri çox da güclü deyil. Yəqin, onun mövqeyi zəifləyib və qərarları Maliyyə Nazirliyi və Maliyyə Bazarlarına Nəzarət Palatası qəbul edir», deyə Həsənov bildirib.

Ekspert qeyd edib ki, “Bank Standart» Elman Rüstəmov bank nəzarətinə rəhbərlik  edəndə çətin vəziyyətə düşüb, bu vəziyyətə görə o, məsuliyyət daşıyır, çünki məhz o vaxtlar bank özünü doğrultmayan kreditlər verib.

«Bankın lisenziyasının ləğvi ilə bağlı vaxtın uzadılması ona sərfəli idi, çünki məsuliyyəti üzərindən ata bilərdi. Yəqin, 26 sentybarda bəyanat verəndə o, başqa strukturları fakt qarşısında qoymaq istəyib», deyə Həsənov bildirib.

Digər ekspert Natiq Cəfərli hesab edir ki, Elman Rüstəmov belə yanlış bəyanatlara görə mənəvi məsuliyyət daşıyır.

«Bu bankda 200 minədək insanın depoziti olub. AMB rəhbərinin bəyanatı çoxlarını sakitləşdirdi. Elman Rüstəmov onlardan üzr istəməlidir», deyə N.Cəfərli hesab edir.  

Ekspert qeyd edib ki, belə bəyanatlar baş bankirin imicinə zərbədir, çünki 4 gün sonra baş verəcək hadisə barədə onda məlumat olmayıb.  

«Bu ranqda adamların bəyanatları maliyyə bazarına güclü təsir edə bilər. Nəzərə almaq lazımdır ki, devalvasiyanın olmayacağı barədə bəyanat verəndən sonra ona etimad çox aşağı idi. Bundan sonra onun bəyanatlarına inam daha da azalacaq», deyə N.Cəfərli hesab edir.   

Qeyd edək ki, Elman Rüstəmov 26 sentyabrda devalvasiya ilə bağlı bəyanat verərək, deyib ki «manatın kəskin devalvasiyası gözlənilmir». Onun sözlərinə inanmaq və ya inanmamaq artıq hər kəsin şəxsi işidir. 71В