Əmanətlərin Sığortalanması Fondu yarım ilin hesabatını açıqlayıb

Azərbaycan Əmanətlərin Sığortalanması Fondu yarımilin hesabatını açıqlayıb.  

2015-ci ilin 6 ayının yekunlarına görə, Azərbaycan Əmanətlərin Sığortalanması Fondunun sığorta ehtiyatları 103 mln manat olub (+17,6%, ilin əvvəlində 87 mln 562 min manat idi).

İqtisadçı Samir Əliyev  Turan-a bildirib ki, Fond təəssüf ki, əvvəlki dövrlərlə müqayisədə bu dəfə açıqlamaya qorunan əmanətlərin həcmi barədə məlumatı daxil etməyib. Buna baxmayaraq əmanətlərin sığortalanması sahəsində son bir ildə (II rüb 2014 – II rüb 2015) müəyyən tendensiyaları müşahidə etmək olub. Belə ki, kompensasiya olunan əmanətlərin payı azalaraq 31%-dən 28%-ə düşüb. Qorunan əmanətçilərin payı 91%-dən 90%-ə azalıb. Əmanətlərin dollarlaşmasının nəticəsi olaraq qorunan əmanətlərdə ABŞ dollarının payı 34%-dən 69%-ə yüksəlib. Manat əmanətlərin payı isə müvafiq olaraq azalıb və 62%-dən 27%-ə düşüb. Nəhayət, Fondun vəsaitlərinin illik gəlirliliyi 4,34%-dən 4,2%-ə enib

Əmanətlərin azalması iyun ayında da davam edib və 40 milyon manat azalaraq 7,56 milyarda manata düşüb. Ümumiyyətlə, əmanət qoyuluşu 4 aydır ki, azalır. 4 ayda əmanət qoyuluşu 5% və ya 371 milyon manat azalıb.

ADİF-in sərbəst vəsaitlərinin idarə edilməsi Fondun investisiya siyasətinə uyğun olaraq həyata keçirilir. Fondun vəsaitlərinin 85,5 milyon manatı dövlət qiymətli kağızlarında yerləşdirilmiş və illik gəlirlilik orta hesabla 4,2 % təşkil edib. Fondun 5 milyon avro vəsaiti isə “Deutsche Asset & Wealth Management International” şirkəti vasitəsi ilə idarə olunur. Fondun sərbəst vəsaitləri 11,4 milyon. manat təşkil edib.

AƏSF-ə  üzv olan banklarda fiziki şəxslərin cəmi əmanətləri 7, 561 milyard manat təşkil edib. Yanvardan əhalinin əmanətləri 13,2% artıb.

Üzv banklar tərəfindən 7 147 401 əmanətçiyə xidmət göstərilir ki, onların da 90%-i sığortalanan əmanətçilərdir. Bu ilin 6 ayının yekunlarına görə, sığortalanan əmanətçilərin sayı 6 444 188 (90 %) nəfərdir.

 Sığortalanan əmanətlərin 69%-i ABŞ dollarının, 27%-i manatın, 4%-i avronun payına düşür.

İlin 6 ayının nəticəsinə görə Fondun gəlirləri 12,4 milyon manat olub ki, bunun da 10,6 milyon. manatını sığorta haqları, 1,8 min manatını isə faiz gəlirləri təşkil edib. Fondun cəmi xərcləri 766,5 min manat təşkil edib.

Xatırladaq ki, 2015-ci ilin II rübünün sonuna Fondun iştirakçısı olan bankların sayı 44-dür. AƏSF-ə üzv olan bir və ya bir neçə bankda sığorta hadisəsi baş verdiyi zaman Fond tərəfindən sığortalanan əmanətlərə görə, əmanətçiyə hər bir sığorta hadisəsi üçün 30 000 manat məbləğində kompensasiya ödənilir. --17D—