Əmlak Məsələləri üzrə Dövlət Komitəsi Bakı İcra Hakimiyyətinin icazəsi ilə tikilmiş istixananı sökəcəyi ilə hədələyir

Bakı/29.07.17/Turan: "Dünən Əmlak Məsələləri üzrə Dövlət Komitəsinin əməkdaşları əmlakın məhv ediləcəyi ilə hədələyərək Bakı şəhəri Sabunçu rayonunun Maştağa qəsəbəsində istixana kombinatının tikintisini dayandırmağa çalışıblar", - deyə tikilən istixananın sahibi İsgəndər Qurbanov bəyanatla Turana müraciət edib.

Onun sözlərinə görə, istixana kombinatı Bakı şəhər İcra Hakimiyyəti başçısının 04.11.2016-cı il tarixli 460 saylı sərəncamı ilə bu məqsədlər üçün ayrılmış 28 hektar sahədə Fransanın "Ришель" şirkətinin iştirakı ilə tikilir. Layihə Azərbaycan İqtisadiyyat Nazirliyinin İnvestisiyaların Təşviqi Proqramına daxil edilib, onun reallaşdırılması üçün Sahibkarlığa Kömək Milli Fondunun (SKMF) xətti ilə kredit ayrılıb. Layihə əvvəlcədən 250 yeni iş yeri və $10 mln. məbləğində illik tərəvəz istehsalı üçün nəzərdə tutulub.

Redaksiya sorğusuna cavab verərək, İ.Qurbanovn mənafeyini təmsil edən hüquqşünas Eldar Hüseynov bildirib ki, Əmlak Məsələləri üzrə Dövlət Komitəsi (ƏMDK) öz hərəkətlərini sahibkarın kadastr çıxarışının olmaması ilə əsaslandırır, lakin bu barədə müraciət həmin idarəyə hələ bu ilin martında göndərilib, fəqət indiyədək cavab alınmayıb. "Digər dəlil də var idi. Sən demə, icra başçısı öz sərəncamını ƏMDK ilə razılaşdırmayıb, amma bu, Bakı şəhər İcra Hakimiyyəti ilə Əmlak Məsələləri üzrə Dövlət Komitəsi arasında həll edilməli olan idarələrarası problemdir ", - deyə E. Hüseynov bildirib.

Onun dediyinə görə, hələ martda İ. Qurbanov kadastr çıxarışı almaq üçün müraciət edib. "Qanuna əsasən, ƏMDK kadastr çıxarışını artıq bir aydan sonra təqdim etməli idi, lakin bunu etməyib, dünən isə ƏMDK nəzdindəki Daşınmaz Əmlakın Kadastrı və Ünvan Reyestri Xidmətinin əməkdaşları demək olar ki, artıq tikilmiş istixana kombinatını dağıtmaq hədələri ilə obyektə gəliblər. Qanuna görə, belə hərəkətlər bu qurumun səlahiyyətinə aid deyil, bunu müvafiq məhkəmə qərarından sonra FHN edə bilər", - deyə hüquqşünas vəziyyəti şərh edərək, dəqiqləşdirib ki, ƏMDK-nin əməkdaşları bu vəziyyəti kadastrdan çıxarışın verilməsini bilərəkdən yubadaraq yaradırlar.

Bu hadisələr fonunda ƏMDK-nın cari ilin mart ayında verdiyi bəyanat diqqətəlayiqdir: sənəddə bildirilir ki, Əmlak Məsələləri üzrə Dövlət Komitəsinin əməkdaşları Bakı şəhəri Sabunçu rayonunun Ramana və Maştağa qəsəbələrində kənd təsərrüfatı torpaqlarının məqsədli istifadə olunmasının monitorinqini keçiriblər.Onun gedişində 25 hektar kənd təsərrüfatı təyinatlı torpaq sahəsində başlanmış icazəsiz tikinti müəyyən edilib və onun qarşısının alınması üzrə tədbirlər görülüb.

Əmlak Məsələləri üzrə Dövlət Komitəsi 2009-cu il mayın 19-da AR Prezidentinin müvafiq fərmanı ilə yaradılıb. Dövlət Komitəsinin əsas fəaliyyət istiqamətləri bunlardır: dövlət əmlakının idarə edilməsi, investisiyaların cəlb edilməsi, daşınmaz əmlak və torpaq sahələrinin vahid kadastrının aparılması, torpaq bazarının təşkili, torpaqların mühafizəsi və keyfiyyətinin yüksəldilməsi.

ƏMDK-in nəzdində Daşınmaz Əmlakın Kadastrı və Ünvan Reyestri Xidməti fəaliyyət göstərir: bu, icra hakimiyyətinin Azərbaycanda daşınmaz əmlakın vahid dövlət kadastrı, ünvan reyestri, dövlət torpaq kadastrı, yer quruluşu işləri və xüsusi təyinatlı geodeziya işlərinin həyata keçirilməsini təmin edən orqanıdır. Obyektlərin tikintisinə nəzarət və sökülməsi qurumun səlahiyyətinə daxil deyil. -0-