Fevraldan BFB fasiləsiz ticarətə keçid üzrə yeni mərhələyə start verir

Fevralın 1-dən  Bakı Fond Birjası (BFB)  fasiləsiz ticarətə keçid üzrə yeni mərhələyə start verir. Məqsəd BFB-nin ticarət sistemində əqdlərin bazarda mövcud olan ən yaxşı qiymətlə dərhal bağlanmasının təminatıdır. 

BFB-nin məlumatında deyilir ki, bazarda ədalətli qiymətlərin formalaşması, şəffaflığın artırılması və investorların maraqlarının müdafiəsi məqsədilə eyni bir broker şirkətinin həm alıcı, həm də satıcı tərəf olduğu əqdlər (kross əqdlər) qabaqcadan müəyyən edilmiş müddət ərzində bazara açıqlanacaq və digər birja üzvləri tərəfindən daha rəqabətli qiymətlərin təklif olunması üçün şərait yaranacaq. 

Hazırda praktik olaraq səhmlər üzrə bütün əqdlər ünvanlı xarakter daşıyır və 

kross əqdlər hesab olunur. Birjada hərraca çıxarılan səhmlər üzrə əqdlərin qiyməti 95% halda nominaldan fərqlənmir. İnvestorlarda səhmlərin real dəyəri ilə bağlı digər informasiya mənbəyi yoxdur. Bir çox hallarda səhmlərin faktiki dəyəri birjada qeydə alınmış qiyməti bir neçə dəfə üstələyir. 

Birjada güman edirlər ki, yeniliklər qiymətli kağızlar bazarının genişləndirilməsinə, həmçinin tələb və təklifin stimullaşdırılmasına xidmət edəcək.  08D