Kommersiya nəqliyyat vasitələrinə 300 min fərqlənmə nişanı verilib

Nəqliyyat Nazirliyi 2012-ci ildə avtomobil nəqliyyatı sistemində icazə sistemi üzrə hesabatı açıqlayıb. 

Ötən il sərnişin və yük daşımaları həyata keçirən nəqliyyat vasitələrinə 299271 ədəd fərqlənmə nişanı verilib. Bu nişanlar bir ay qüvvədədir və avtodaşıyıcılar üçün vergi ödənişi formasıdır. Fərqlənmə nişanlarına görə dövlət büdcəsinə 7,3 milyon manat vəsait ödənilib. 

Avtomobil daşımalarını həyata keçirən hüquqi və fiziki şəxslərə 565 lisenziya verilib. Bu lisenziyalar 2219 avtonəqliyyat vasitəsi üçün qüvvədədir. Təkcə ötən il Bakıda 1203 yeni taksi avtomobili, o cümlədən min ədəd TX4 istismara verilib. Avtonəqliyyat vasitələrinin lisenziyalaşdırılmasından dövlət büdcəsinə 86,1 min manat vəsait daxil olub. 

Nəqliyyat Nazirliyi avtomobil daşımalarında istifadə edilən nəqliyyat vasitələrinin reysqabağı texniki müayinəsini keçirib və bundan 851,0 min manat məbləğində vəsait əldə edilib. 

Nəqliyyat Nazirliyinin mətbuat xidmətində bildiriblər ki, 2012-ci ildə  beynəlxalq avtomobil daşımalarını həyata keçirmək üçün 30 ölkənin nəqliyyat qurumları ilə 46850 ədəd “İcazə” mübadiləsi aparılıb. İcazə sistemində dövlət büdcəsinə 466 min 453 manat məbləğində vəsait mədaxil edilib. 08D