Hesablama Palatası AZAL-da nöqsanlar aşkarlayıb

Hesablama Palatası “Azərbaycan Hava Yolları” QSC-də Vergilər Nazirliyi ilə birgə apardığı yoxlamanın nəticələrini açıqlayıb. Yoxlama 2011-2013-cü illərdə “Azərbaycan Hava Yolları” QSCtərəfindən dövlət büdcəsinin gəlirlərinin hesablanılması və dövlət büdcəsinə ödənilməsi, eləcə də dövlət əmlakından istifadə olunması vəziyyət ilə bağlı  aparılıb.

Audit müəyyən edib ki, Azərbaycan rezidenti olan aviaşirkətlərə reaktiv yanacaq satışı zamanı vergi rejimi pozulub və dövlət büdcəsinə mənfəət vergisi az hesablanıb.

Həmçinin rezident hüquqi şəxslərə verilən reaktiv yanacaq məhsulları üzrə dövriyyələrin əlavə dəyər vergisinə cəlb edilməyib, bir sıra alışlar zamanı əlavə dəyər vergisi üzrə öhdəliklərin yerinə yetirilməyib, vergi agenti qismində ödəmə mənbəyində tutulan vergilərin birbaşa dövlət büdcəsinə ödənilməyib və s.

Hesablama Palatası vergidən yayındırılan məbləğ barədə məlumat vermir.

Eləcə də  dövlət əmlakının saxlanması və istifadə olunmasında ciddi pozuntular aşkarlanıb. AZAL aviaşirkəti maliyyə intizamına əməl etməyib. Söhbət debitor borcların yığımı, xarici ölkələrdəki nümayəndəliklərdə nağd hesablaşmaların kassa əməliyyatlarına dair müəyyən edilmiş tələblərə uyğun tam rəsmiləşdirilməsindən gedir. Bundan başqa, müəyyən edilib ki, AZAL beynəlxalq sərnişindaşımalar üzrə aviabiletin qiymətinin tərkibində tarifdən əlavə yığımların növləri müəyyənləşdirilməyib və miqdarının hesablanması əsasları rəsmiləşdirilməyib.

Bundan əlavə, statistik hesabatların tərtibində təhriflərə yol verilməsi və nizamnamə kapitalının məbləğinin müvafiq sənədlərdə fərqli göstərilməsi də müəyyən edilib.

Hesablama Palatasının qısa məlumatınadn aydın olur ki, yoxlama zamanı AZAL-dakı bəzi nöqsanlar aradan qaldırılıb. Həmçinin nöqsanlara yol vermiş vəzifəli şəxslərin məsuliyyətə cəlb edilməsi barədə qərar qəbul edilib.

Məlumat “Açıq hökumətin təşviqinə dair 2016-2018-ci illər üçün Milli Fəaliyyət Planı”nın icrası olaraq hazırlanıb. 08D