Həyat sığortaçılarının gəlir səviyyəsi artacaq

Dövlət Əmək Müfəttişliyi ilə həyat sığortası şirkətləri əməkdaşlıq müqaviləsi imzalayıb. 

Sənədi Müfəttişliyin rəhbəri İdris İsayev və  “PAŞA Həyat Sığorta”, “Atəşgah Həyat” və  “Qala Həyat Sığorta” şirkətlərinin İH sədrləri imzalayıb. 

İdris İsayevin sözlərinə görə, əməyin mühafizəsi və istehsalatda bədbəxt hadisələrin və peşə xəstəliklərinin azaldılması sahəsində işəgötürənlərin maarifləndirilməsi və məlumatlandırılması nəzərdə tutulur. 

“Atəşgah Həyat Sığorta” Şirkətinin İdarə Heyətinin sədri Əkbər Mədətlinin sözlərinə görə, əmək qabiliyyətli əhalinin 30%-i sığortalanıb. 

Paşa Həyat Sığorta” şirkətinin İdarə Heyətinin sədrinin müavini Niyaz İsmayılov  qeyd edib ki,  bu atılan addım işəgötürənlərin məsuliyyətini artıracaq, həm də işçilərin sosial müdafiəsi üzrə maraqlarını qoruyacaq. 

“İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta haqqında qanun” 2010-cu ilin iyununda təsdiqlənib. 17 dekabrda Maliyyə Nazirliyi normativ-hüquqi sənədləri təsdiqləyib. 

2010-cu ilin noyabrında Nazirlər Kabineti tarifləri təsdiq edib. Burada 14 risk dərəcəsi nəzərdə tutulub. Müəssisələrdə qulluqçu və işçilər üçün sığorta tarifi müəyyən edilib. Müəssisənin risk dərəcəsindən asılı olaraq, 0, 0,2%-2%-dir. Qanuna əsasən, sığorta tarifi müəssisənin əmək haqqı fonduna köçürülür. Sığorta ödənişinin 3 növü var: aylıq, birdəfəlik, əlavə. 

Bundan başqa, hər il dövlət büdcəsinin xərclər hissəsində istehsalatda bədbəxt hadisələrlə bağlı 10 mln manat nəzərdə tutulur. --17D—