Hökumət enerji daşıyıcıları və kommunal xidmətlər tarifinə yenidən baxılması planını BVF ilə müzakirə etməyib

Beynəlxalq Valyuta Fondunun enerji daşıyıcıları və kommunal xidmətlər tarifinə yenidən baxılması üzrə hər-hansı tövsiyəsi yoxdur və missiyanın Bakıya səfəri zamanı hökumət bununla bağlı planlarını bölüşməyib. Bu barədə BVF-nin Azərbaycan üzrə missiyasının rəhbəri Raca Almarzogi son iqtisadi proseslərin qiymətləndirilməsi üzrə səfərin (8-15 noyabr) yekunlarına həsr olunmuş bugünki mətbuat konfransında Turan-ın müxbirinin sualının cavabında bildirib.

BVF nümayəndəsi qeyd edib ki, hökumətlə tariflərin dəyişdirilməsi haqqında müzakirələr aparılmayıb. “Biz sadəcə dövlət büdcəsinin qeyri-neft sektorundan gəlirlərinin artırılması üzrə tədbirlər həyata keçirməyi tövsiyə etdik”, deyə Almarzogi qeyd edib.

Ölkənin iqtisadi vəziyyətini və 2014-cü ilə olan planlarını qiymətləndirən nümayəndə bildirib ki, neft hasilatı sabitləşdikdən sonra gələn il üçün Azərbaycanın perspektivləri ümidvericidir: 2014-cü il üçün ÜDM-in, bu il də olduğu kimi, 5% artacağı gözlənilir. İnflyasiya təxminən 3% olacaq.

Missiya hökumətin büdcə siyasəti, dövlət xərclərinin səmərəliliyinin artırılması və təqaüd islahatları üzrə müəyyən addımlarını müsbət qiymətləndirir.

“Biznes iqliminin yaxşılaşdırılması yeni bazarlara çıxmağa imkan verəcək. Bunun üçün isə Gömrük Məcəlləsinin tələblərinə riayət olunması, Ümumdünya Ticarət Təşkilatına daxil olma prosesinin yekunlaşdırılması, ümumilikdə idarəetmənin təkmilləşdirilməsi tələb olunur”, deyə Almarzogi bildirib. Eyni zamanda, o, sahibkarlıq sahəsində yoxlamalar haqqında qanunun qəbulunu və bu sənədin bank və sığorta sahələrinə şamil edilməməsini müsbət qarşılayıb. -08C-