Hökumət vətəndaş cəmiyyətinin təqdim etdiyi təkliflərin hamısını nəzərə almayıb

Hökumət “Açıq hökumətin təşviqinə dair 2016-2018-ci illər üçün Milli Fəaliyyət Planı”nı hazırlayan zaman vətəndaş cəmiyyətinin təqdim etdiyi təkliflərin bir hissəsini nəzərə alıb. Bu barədə QHT təmsilçisi Samir Əliyev Turan-a bildirib.

Yeni sənədddən görünür ki, əsas diqqət informasiya texnologiyaları və elektron xidmətlərin tətbiqinə ayrılıb, halbuki şəffaflığı, hesabatlılığı, hökumətin fəaliyyətinin səmərəliliyini artırmaq zəruridir, deyə o qeyd edib.

Samir Əliyevin sözlərinə görə, vətəndaş cəmiyyəti təklif edib ki, heç olmasa dövlət vəsaitlərinin mənimsənilməsində iştirak edən şirkətlərin təsisçiləri haqqında informasiya açıqlanmalıdır. Amma bu təklif nəzərə alınmayıb.

Qeyd edək ki, Milli fəaliyyət planı maliyyə şəffaflığının təminatı üzrə bir sıra tədbirlər nəzərdə tutur. Onların arasında vətəndaş cəmiyyəti institutlarının dövlət büdcəsi layihəsinin müzakirəsində iştirakının təminatı, Hesablama Palatasının yekun rəyi ilə dövlət büdcəsinin yerinə yetirilməsi ilə bağlı illik hesabatın açıqlanması, Maliyyə Nazirliyinin saytında dövlət büdcəsinin yerinə yetirilməsi ilə bağlı rüblük hesabatın yerləşdirilməsi var. Hesablama Palatası keçirdiyi audit tədbirləri barədə ictimaiyyətə məlumat verməlidir. 

Dövlətin nəzarət etdiyi şirkətlər, həmçinin büdcə təşkilatları 2016-cı ildən maliyyə hesabatları dərc edəcək. Dövlət büdcəsindən vəsaitləri istifadə edən şirkətlər bu barədə korporativ saytlarda və KİV-də hesabat verəcək. 08B