İcbari Sığorta Bürosu 5 min manat kompensasiya ödənişi həyata keçirib

İcbari Sığorta Bürosu vətəndaşın yol-nəqliyyat hadisəsi nəticəsində həlak olması ilə əlaqədar 5000 ( beş min ) manat məbləğində kompensasiya ödənişi edib. Büronun məlumatına görə (http://isb.az/index.php?option=com_content&view=article&id=110%3Acbari-sorta-buerosu-trfindn-31052013-cue-il-tarixind-noevbti-kompensasiya-oednii-hyata-kecirilmidir&catid=2%3A2011-11-10-08-59-24&Itemid=5&lang=az), hadisə 14.09.2012-ci il tarixdə Mərdəkan qəsəbəsində baş verib. 

"Kompensasiya ödənişi 31 may 2013-cü il tarixində qeyri-nəğd üsulu ilə (poçt vasitəsilə) həyata keçirilmişdir", - deyə məlumatda bildirilir. Bu, Büronun 11-ci kompensasiyasıdır. 1 yanvar 2013-cü il üçün Büronun ehtiyatları 4 mln 88,67 min manat olub. 

İcbari Sığorta Bürosu 16 dekabr 2011-ci ildə yaradılıb. Hazırda 11 üzvü var.  

Büronun əsas funksiyası – kompensasiya ödəmələri həyata keçirmək və onların vasitəsilə bu kompensasiyaların ödəniləcəyi müəyyən maliyyə fondunu idarə etməkdir. Kompensasiyalar Büroya üzv olan sığorta şirkətləri müflisləşəcəyi təqdirdə ödəniləcək. 

Büronun maliyyə vəsaitləri üzvlük haqlarından, hər icbari sığorta növlərinə dair zəmanət depoziti, həmçinin sığorta şirkətlərinin hər ay büroya köçürəcəyi icbari növlərə görə ümumi mükafatların həcminin 5%-dən formalaşır. 

“İcbari sığorta növləri haqqında» qanun 4 icbari sığorta növünə şamil edilir. Bunlar avtonəqliyyat sahiblərinin mülki məsuliyyətinin icbari sığortası, daşınmaz əmlakın sığortası, daşınmaz əmlak istifadəsi zamanı mülki məsuliyyətin sığortası, sərnişinlərin sığortasıdır.

Bu zaman qanunun şərtlərinə görə, bu icbari sığorta növlərinə görə xidmətləri ancaq Büro üzvü olan sığorta şirkətləri təqdim edə bilər. --17D—