Elmar Məmmədyarov: Amerika administrasiyasının münaqişənin yerindən tərpənməsində böyük marağı var

İyunun 7-də Londonda Azərbaycan xarici işlər naziri Elmar Məmmədyarovun ATƏT-in Minsk qrupunun həmsədrləri ilə görüşü olacaq. Bu barədə nazir Məmmədyarov iyunun 3-də Vaşinqtonda Amerika dövlət katibi Con Kerri ilə görüşündən sonra jurnalistlərə bildirib. 

Nazir ATƏT-in Minsk qrupunun həmsədrləri ilə görüşdən sonra Vaşinqtonda amerikalı həmsədr Yan Kelli ilə də görüşəcək. 

E.Məmmədyarov dövlət katibi ilə görüşündən razı qaldığını deyib. “Cənab Kerri münaqişədə irəliləyiş üçün münaqişənin detalları ilə maraqlandı. O da təsdiq edir ki, Amerika administrasiyası hesab edir ki, münaqişənin nizamlanması yerindən tərpənməlidir. Münaqişə regiona yalnız problem gətirir. Amerika istəyir ki, həmsədrlərlə, regionun digər dövlətləri ilə birgə danışıqları intensiv şəkilə salsın, həm də irəliləyiş olsun. Cənab Kerri təsdiq edir ki, Amerika administrasiyasının münaqişənin yerindən tərpənməsində böyük marağı var”, deyə nazir bildsirib. 

Onun dediyinə görə, Amerika başa düşür ki, işğal olunmuş torpaqlar, məcburi köçkünlər, status məsələsi böyük problemlərdir. Onu da başa düşürlər ki, danışıqlarda irəliləyiş olmasa regiona böyük zərbə vuracaq”. 

Nazir Ermənistan qoşunlarını işğal edilmiş Azərbaycan torpaqlarından çıxarsa, nə qazanacağının da söhbət mövzusu olduğunu deyib. 

“Azərbaycan deyir ki, bu, iqtisadi baxımdan, o cümlədən Ermənistan iqtisadiyyatı baxımından çox önəmlidir. Təhlükəsizlik baxımından önəmlidir. Bizə deyirlər siz silah alırsınız. Mən deyirəm ki, Azərbaycanın işğal olunmuş əraziləri olduğuna görə silah alırıq. Deyirəm Ermənistan qoşunlarını çıxarsın, silaha verdiyimiz pulları regionun inkişafına yönəldək. Bu baxımdan Amerika tərəfi də razılığa gəlib ki, münaqişədə irəliləyiş olsun. O zaman SSRİ ilə Amerika da silahlanma ilə bağlı qərar qəbul edib və oradan qalan pullar iqtisadiyyata yönəldilib”. 

Nazir Azərbaycanın ATƏT-in Minsk qrupunun fəaliyyətindən narazı olduğunu da diqqətə çatdırıb. 

“Narazıyıq ki, Azərbaycan əraziləri hələ də işğaldadır və məcburi köçkünlər öz evlərinə qayıda bilmir. Əgər ərazilər işğaldadırsa, biz Minsk qrupundan necə razı ola bilərik? Məntiq çox sadədir. Minsk qrupunun üzvləri BMT TŞ-nin daimi üzvləridir. BMT TŞ-nin Azərbaycan ərazilərinin işğaldan azad edilməsi ilə bağlı 4 qətnaməsi yerinə yetirilməlidir. Digər tərəfdən, biz tələb edirik ki, səylərini canlandırsınlar ki, işğal olunmuş torpaqlar azad edilsin, hansı ki, sülh yolu ilə nizamlanma planının əsasını təşkil edir ”, deyə o bildirib. 

Nazir həmçinin danışıqlarda Amerikanın daimi əsaslarla Minsk qrupuna həmsədr təyin edilməsinə toxunulduğunu deyib. “Dövlət katibi yaxın zamanda bunun baş verəcəyini bildirdi”, deyə o qeyd edib. -03D-