İcbari sığortanın xüsusi çəkisi artır

İcbari Sığorta Bürosuna üzv olan sığorta şirkətlərinin yanvar-noyabrda yığdığı minimal mükafat səviyyəsi 4,2 mln manat olub. Büroda üzvlüyün faydası odur ki, məsələn, “Meqa Sığorta” ötən il 1 dekabra kimi 965,11 min manat yığmışdı, bu il 4 mln 226,57 min manat toplayıb və Büroya üzv olmayan yaxşı kapitallı rəqiblərini keçib. 

 Bu il Büro üzvləri 229 mln 573 min 844,32 manat toplayıblar, bu, ümumi həcmin (312 mln 968,99 min manat) 73,35%-dir. Müqayisə üçün deyək ki, ötən il bu şirkətlər 135,9 mln manat mükafat yığmışdı. Buraya istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığortanı da əlavə etsək, yerli bazar əsasən (KTS və КАСКО istisna) icbari sığortadan ibarətdir. 

Ödənişlər üzrə nisbət də eynidir – müştərilər sığorta hadisələri üzrə 59,9 mln manat (ödənişlərin 72,57%-i) əldə edib. 

 İcbari Sığorta Bürosu 16 dekabr 2011-ci ildə yaradılıb. Hazırda 12 üzvü var. 

Büronun əsas funksiyası – kompensasiya ödəmələri həyata keçirmək və onların vasitəsilə bu kompensasiyaların ödəniləcəyi müəyyən maliyyə fondunu idarə etməkdir. Kompensasiyalar Büroya üzv olan sığorta şirkətləri müflisləşəcəyi təqdirdə ödənilir. 

Büronun maliyyə vəsaitləri üzvlük haqlarından, hər icbari sığorta növlərinə dair zəmanət depoziti, həmçinin sığorta şirkətlərinin hər ay büroya köçürəcəyi icbari növlərə görə ümumi mükafatların həcminin 5%-dən formalaşır. 

“İcbari sığorta növləri haqqında» qanun 4 icbari sığorta növünə şamil edilir. Bunlar avtonəqliyyat sahiblərinin mülki məsuliyyətinin icbari sığortası, daşınmaz əmlakın sığortası, daşınmaz əmlak istifadəsi zamanı mülki məsuliyyətin sığortası, sərnişinlərin sığortasıdır.

Bu zaman qanunun şərtlərinə görə, bu icbari sığorta növlərinə görə xidmətləri ancaq Büro üzvü olan sığorta şirkətləri təqdim edə bilər.  --17D—