İctimai nəqliyyatda ödəniş kartlarının tətbiqi gecikir

Bakıda ictimai nəqliyyatda ödəniş kartları vasitəsilə gediş haqqının ödənilməsi iyun üçün planlaşdırılıb. Amma bunun üçün 500 min plastik kart buraxılmalıdır, deyə Nəqliyyat Nazirliyinin mətbuat katibi Namiq Həsənov Turan-a bildirib. O, ödəniş kartlarının tətbiqi tarixini dəqiqləşdirməyib.

Onun sözlərinə görə, kartlar Türkiyədə hazırlanır. Layihənin operatoru "Bank of Azerbaijan"dır. Artıq “MasterCard” sisteminin 200 min ödəniş kartı hazırlanıb. Kartların qiyməti 1 manat olacaq və metroda da istifadə edilə biləcək. Onlardan mal və xidmət alışında da istifadə mümkün olacaq, deyə NN təmsilçisi bildirib.

«Avtobuslarda güzəştli gediş məsələsi bankın müstəsna hüququdur», - deyə Həsənov bildirib və dəqiqləşdirib ki, ictimai nəqliyyatda nağdsız ödənişə daha 3-4 bank cəlb edilə bilər.

İlkin mərhələdə 29 marşrutda 500 avtobus zəruri avadanlıqla təchiz ediləcək. Bakıda cəmi 217 marşrut, 2 500 avtobus var. Nağdsız ödənişə keçid 2014-cü ildə başa çatacaq, deyə Həsənov bildirib.

Nəqliyyat Nazirliyinin daşıyıcı şirkətlərlə danışıqları onunla nəticələnib ki, onlar nağdsız ödənişə keçiddən sonra sürücülərə ayda 700-800 manat maaş verməyə hazır olduqlarını bildiriblər. --08B—