İ.Əliyev «İnvestisiya təşviqi» ilə bağlı fərman imzalayıb

Dövlət başçısı İlham Əliyev investisiyaların təşviqilə bağlı əlavə tədbirlər haqqında Fərman imzalayıb.

Fərman ölkədə investisiyaların təşviqilə bağlı mexanizm və normativ hüquqi aktların hazırlanmasını nəzərdə tutur. 

Fərman “İnvestisiya təşviqi sənədinin verilməsi Qaydası”nı təsdiq edir (əlavə olunur).

İqtisadiyyat Nazirliyinə investisiya təşviqi sənədinin və həmin sənədi almaq üçün ərizənin formalarını bir ay müddətində müəyyən etmək tapşırılır. 

Nazirlər Kabinetinə prezident aktlarının bu Fərmana uyğunlaşdırılması ilə bağlı təklifləri 3 ay müddətində hazırlayıb prezidentə təqdim etmək tapşırılır.

Bu Fərmanla təsdiq edilən Qaydanın 10-cu hissəsinə uyğun investisiyanın həyata keçirildiyi iqtisadi fəaliyyət sahələrini, investisiya layihəsinin həcmi ilə bağlı minimal məbləği və həyata keçiriləcəyi inzibati ərazi vahidlərini İqtisadiyyat Nazirliyinin təklifləri əsasında bir ay müddətində müəyyən edib Azərbaycan Respublikasının Prezidentinə məlumat vermək tapşırılır. 

Nazirlər Kabinetinin normativ hüquqi aktlarının bu Fərmana uyğunlaşdırılması üçün üç ay vaxt verilir.

Mərkəzi icra hakimiyyəti orqanlarına normativ hüquqi aktların bu Fərmana uyğunlaşdırılmasını nəzarətdə saxlamaq və bunun icrası barədə beş ay müddətində Azərbaycan Respublikasının Prezidentinə məlumat vermək tapşırılır.

Vergilər Nazirliyi və Dövlət Gömrük Komitəsi investisiya təşviqi sənədini almış şəxslərə qanunla nəzərdə tutulmuş güzəştlərin tətbiqi üçün müvafiq tədbirlər görmək, Ədliyyə Nazirliyinə mərkəzi icra hakimiyyəti orqanlarının normativ hüquqi aktlarının və normativ xarakterli aktların bu Fərmana uyğunlaşdırılmasını təmin edərək Nazirlər Kabinetinə məlumat vermək tapşırılır. -0-