İlham Əliyev ARDNŞ-nin qarşısına vəzifə qoyub: 3 ildən sonra avro-5 benzini istehsal edilməlidir

“Neft Emalı Zavodumuz yenidən qurulacaq. Artıq layihə təqdim edilib. Hələ ətraflı danışmaq istəmirəm”, deyə iyulun 1-da Nazirlər Kabinetinin iclasında prezident Ilham Əliyev bildirib.

“Zavodumuzda minimum "avro-5" benizini istehsal edilməlidir. Müddət də qoymuşam: 3 il” , - deyə dövlət başçısı bəyan edib.

Dövlət başçısının bəyanatını şərh edərkən Caspian Barrel Mərkəzində Turan-a bildiriblər ki, “NEZ-in modernləşdirilməsi layihəsi”nin müzakirəsi bu istiqamətdə bir sıra detallara aydınlıq gətirir.

Əvvəla, prezident tək halda “Neft Emalı Zavodumuz” deyir. Amma ARDNŞ-nin iki NEZ-i var. Demək, H.Əliyev adına NEZ yenidən qurulacaq.

İkincisi, “Azərneftyağ”, yəqin, söküləcək. Mayda  ARDNŞ rəhbəri jurnalistlərə demişdi ki, bu NEZ-in taleyi ilə bağlı heç nə məlum deyil.

Üçüncüsü, “avro-5” benzini buraxmaq üçün yeni qurğular tikilməlidir. Bu isə yüz milyonlarla vəsait tələb edir. ARDNŞ bu xərcə o halda gedə bilər ki, “Azərneftyağ”ın bitum qurğusu H.Əliyev adına NEZ-ə köçürülsün.

Səylərini bu NEZ-ə yönəldərək ARDNŞ 2018-ci il üçün istehsal imkanını artırmaq və  neft məhsulları (benzin və dizel yanacağı) satmaq, işçi heyətini (bir NEZ artıq olmayacaq) azaltmaq imkanı qazanır. Nəticədə şirkətin xərcləri azalacaq, gəlirləri artacaq.

Hadisələr belə inkişaf etsə, hökumət 2-2,5 ilə NEZ-in ərazisini söküb Bakı bulvarını genişləndirə bilər.

Bəs Yeni Qaradağ ВNEZ layihəsi nə olacaq? Caspian Barrel-də hesab edirlər ki, bu, çox böyük layihədir və əvvəlcə qaz-kimya və qaz emalı zavodu tikilməlidir. Yeni NEZ gələn onilliyin ortalarına hazır olacaq. Ona görə, yəqin, ARDNŞ-də qərara alıblar ki, ən yaxşı çıxış yolu H.Əliyev adına NEZ-in modernləşdirilməsidir. –12А--