İlham Əliyev yeni dəniz limanının istismara veriləcəyi tarixi açıqlayıb

Ələtdə tikilən dəniz limanının birinci mərhələsi 2014-cü ilin iyununa kimi istismara verilə bilər. Bundan sonra mövcud liman köçürüləcək və yeri abadlaşdırılacaq, deyə Azərbaycan prezidenti İlham Əliyev "2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı"nın icrasının yekunlarına həsr olunmuş konfransda bildirib. 

Bu ilin noyabrında nəqliyyat nazirinin müavini Musa Pənahov jurnalistlərlə söhbətində bildirmişdi ki, bərə terminalının tikintisi 2014-cü ildə başa çatacaq. 

Dəniz limanının birinci mərhələsi istismara veriləndən sonra bərə daşımaları yeni terminalda olacaq. Bundan sonra quru yük terminalı tikiləcək. İlham Əliyev xatırladıb ki, Bakı-Tbilisi-Qars dəmir yolunun tikintisi 2014-cü ilin sonunda başa çatacaq. Ona görə yeni limanın tikintisi sürətlənməlidir. 

Ələtdə tikilən dəniz limanının sifarişçisi Nəqliyyat Nazirliyidir. Tikintiyə investisiyaların 3 mərhələdə 870 mln manat, o cümlədən I mərhələdə 540 mln manat olduğu bildirilir. 

Liman 400 ha ərazini tutur. Bunun 100 hektarını Beynəlxalq Logistika Mərkəzi (I mərhələdə 50 ha) tutacaq. Limanın ilkin gücü ildə 10 mln ton yük və 40 min konteyner olacaq. 3-cü mərhələdə 25 mln ton yük və 1 mln konteynerə çatacaq. 

Mövcud limanın potensial yük dövriyyəsi 15 mln maye və 10 mln ton quru yükdür.