İlham Əliyev Zaqatalada

  Azərbaycan Respublikasının Prezidenti İlham Əliyev noyabrın 4-də Zaqatalada  Heydər Əliyev Fondunun təşəbbüsü ilə inşa edilmiş ümumi sahəsi 1280 kvadratmetr olan 100 uşaq üçün nəzərdə tutulmuş “Qızılgül” körpələr evi-uşaq bağçasının açılışında iştirak edib. Prezident həmçinin Zaqatala-Danaçı-Aşağı Çardaxlar avtomobil yolunun yenidənqurmadan sonra açılışında iştirak edib.

Təmir işləri 2013-cü ildə başlayan bu yolun yenidən qurulması üçün 2013-cü ilin fevralında dövlət büdcəsində nəzərdə tutulmuş Prezidentin ehtiyat fondundan vəsait ayrılıb. Yolun eni 10 metrdir, onun 6,5 metrini asfalt örtüyü təşkil edir.

Prezident İlham Əliyev Zaqatala şəhərində Heydər Əliyev Mərkəzinin açılışında iştirak edib. İnşasına 2013-cü ildə başlanılan binanın ümumi sahəsi 2765 kvadratmetrdir. Burada, həmçinin 350 yerlik konfrans zalı, vətəndaşlıq vəziyyəti aktlarının qeydiyyatı otağı, kinozal, kulinariya və rəsm otaqları, heykəltəraşlıq studiyası, poliqrafiya emalatxanası fəaliyyət göstərəcək.

Həmin gün İlham Əliyev noyabrın 4-də Azərbaycan Müəllimlər İnstitutunun Zaqatala filialının yeni inşa olunan binasının açılışında iştirak edib. 2012-ci il mayın 7-də baş vermiş zəlzələ zamanı Müəllimlər İnstitutunun Zaqatala filialının binası da tamamilə qəzalı vəziyyətə düşmüşdü. Yeni bina 6 min 700 kvadratmetr ərazini əhatə edir, müasir avadanlıqla təchiz edilib.

Zaqatalanın ərazisi 1348 kv km, əhalisi 100 min nəfərdir. Rayon Şəki-Zaqatala iqtisadi rayonuna daxildir. Zaqatalada fındıqtəmizləmə, konserv, süd-pendir, efir yağı, kərpic, asfalt zavodları, mebel və çay fabriki, aeroport var. Rayon ölkənin turizm mərkəzlərindən biridir. —0--