İlk dəfə iqtisadiyyatın sektorları üzrə vergi mədaxili dinamikası məlumatları açıqlanıb

Vergilər Nazirliyi son illər ilk dəfə iqtisadiyyatın müxtəlif sektorları üzrə vergi mədaxili dinamikası məlumatlarını açıqlayıb. Ötən illə müqayisədə bu ilin I yarısında, demək olar ki, bütün sahələrdə vergi mədaxili artıb. 

Vergilər Nazirliyi Vergi siyasəti və strateji araşdırmalar Baş idarəsinin hesablamasına görə, 2013-cü ilin yanvar-iyununda sənaye müəssisələrindən vergi mədaxili 158,8 mln manat və ya 12,1% artıb. Neft və qeyri-neft sənayesi barədə məlumat verilmir. Həmçinin iqtisadiyyatın sektorları üzrə vergi mədaxilinin ümumi həcmi, o cümlədən sənaye fəaliyyəti üzrə dəqiq informasiya açıqlanmır. Açıqlanan diaqramlara əsasən demək olar ki, sənaye sektoru Vergilər Nazirliyinin xətti ilə dövlət büdcəsinə 1 450 mln manat təmin edib.  

Vergi ödənişi həcminə görə bundan sonra xidmət sektoru gəlir – 650 mln manat. Bu sektor üzrə vergi ödənişi artımı 2012-ci ilin I yarısı ilə müqayisədə 91,4 mln manat və ya 16% artıb. 

Faiz nisbətində daha çox (19,4%) artım nəqliyyatda olub. Nəqliyyatçılar I yarımildə 100 mln manatlıq vergi ödəyiblər. Bu, ötən ilin eyni dövründəkindən 17 mln manat çoxdur.    

Ticarət sahəsi dövlət büdcəsinə 220 mln manat köçürüb. 2012-ci ilin I yarısı ilə müqayisədə bu sektorun ödənişləri 21,6 mln manat və ya 10,5% artıb.

Tikintidə yüksək inkişaf tempi olsa da, bu sektor üzrə vergi ödənişləri cəmi 10,4 mln manat və ya 2,5% artıb. Rabitəçilərin vergi ayırmaları 12,7 mln manat və ya 9,9% çoxalıb.

2013-cü ilin I yarısında Vergilər Nazirliyi dövlət büdcəsinə 3 326,1 mln manat təmin edib. Bu, proqnozdan 7,7% çoxdur. Vergi ödənişlərində sənaye, xidmət və tikintinin xüsusi çəkisi 44,2%, 20% və 12,9% olub. 08D