İnternetin qiyməti artacaqmı?

Azərbaycanda genişzolaqlı internet xidmətləri bazarında Rəqabət Məcəlləsinin tələblərinin pozulması ilə bağlı araşdırmalara başlanıb.

Bu barədə avqustun 14-də Antiinhisar və İstehlak Bazarına Nəzarət Dövlət Xidmətinin məlumat yayıb.

Məlumatda bildirilir ki, son dövrlərdə genişzolaqlı internet xidmətləri bazarında fəaliyyət göstərən təbii inhisar subyektləri və bir sıra özəl provayderlərin internet xidmətlərinin minimum tariflərinin yüksəldilməsinə dair xəbərlər yayılıb:

“... Dəyişikliklərdən sonra sürəti 40 mbit/s, aylıq xidmət haqqı 18 manat olan cari minimum tarifli fiber optik internet xidmətlərinin 100 mbit/s-lik sürət və aylıq xidmət haqqı 25 manat olan tariflə əvəzlənəcəyi məlum olub. Nəticə etibarilə, müştərilər (o cümlədən istehlakçı) üçün formalaşan minimum fiber optik internet xidməti tarifinin dəyəri kəskin yüksəlmiş olacaq.”

Məlumatda, əlavə edilir ki, daha aşağı internet sürəti (100 mbit/s-dən aşağı) seçmək istəyən müştərilərin seçim imkanlarının məhdudlaşdırılacağı və onların alıcılıq qabiliyyəti nəzərə alınmadan yüksək sürətli internet paketlərinin yüksək qiymətə təqdim ediləcəyi müəyyən edilib.

Xidmət vurğulayır ki, araşdırma bu il qüvvəyə minən Rəqabət Məcəlləsinə uyğun aparılacaq:

“Məsələ ilə əlaqədar bazar iştirakçılarına sorğu məktubları ünvanlanıb, bir sıra görüşlər keçirilib və onlardan müvafiq məlumatlar istənilib. Araşdırmaların nəticələrinə uyğun olaraq qanunamüvafiq tədbirlər görüləcək”.

Hələlik, bu açıqlamaya məsələdə maraqlı olan tərəflərin münasibətini öyrənmək mümkün olmayıb.

Amma ötən ay ölkə mediasında "Aztelekom" və "Bakı Telefon Rabitəsi"nə istinadən avqustun 15-dən internetin qiymətlərində dəyişiklik olacağı açıqlanmışdı.

Açıqlamada həmin qurumlar bunu müştərilərin yüksəksürətli genişzolaqlı internetə artan tələbatı ilə izah edirlər:

"Bu işlər ölkəmizdə dünya trendləri ilə ayaqlaşma, əhalinin yüksək sürətli internetə olan tələbatında artım tendensiyasını nəzərə alaraq, göstərilən xidmətin keyfiyyətinin yüksəldilməsi və dayanıqlı infrastrukturun təmin edilməsi məqsədilə həyata keçirilir".

Həmin vaxt Azərbaycan İnternet Forumunun prezidenti Osman Gündüz isə demişdi ki, hazırda minimal qiymət 18 manat müəyyən olunub və bu ödənişlə vətəndaş 40 Mbit/s sürət əldə edə bilir: "İndi isə minimal 100 Mbit/s üçün 25 manat olacaq. Görünür, provayderlər, o cümlədən dövlət provayderləri bir anda varlanmaq xətti götürüblər. Baxırlar ki, hamı ölkədə qiymətləri qaldırır, düşünüblər ki, onlar niyə etməməlidirlər".