«InterRail Holding AG» şirkəti «Şimal-Cənub» nəqliyyat dəhlizi üzrə ADY ilə əməkdaşlıqda maraqlıdır

İsveçrənin Sürix şəhərində “Azərbaycan Dəmir Yolları” QSC-nin sədri Cavid Qurbanovun rəhbərlik etdiyi nümayəndə heyəti ilə “İnterRail Holding AG” şirkətinin sədri Hans Raynhard arasında görüş keçirilib.

Görüş zamanı İsveçrə yüklərinin “Şimal-Cənub” və “Cənub-Qərb” beynəlxalq nəqliyyat dəhlizlərinə cəlb edilməsi, isveçrəli tərəfdaşlarla əməkdaşlığın perspektivləri müzakirə olunub.

 «Əsas vəzifəmiz Azərbaycanın əlverişli coğrafi mövqeyindən istifadə edərək, beynəlxalq nəqliyyat dəhlizləri çərçivəsində Mərkəzi və Şərqi Asiyadan Avropaya və əks istiqamətdə, ölkə ərazisindən keçən marşrutlara, tranzit yüklərin cəlb edilməsidir. Bu marşrutlara yük axının cəlb edilməsi üçün bütün imkanlar  səfərbər edilib», - deyə Qurbanov bildirib.
QSC-nin rəhbəri deyib ki, İsveçrənin "Stadler Rail Group" şirkəti ilə geniş əlaqələr var. Hazırda şirkətin istehsalı olan KİSS markalı  ikimərtəbəli elektrik qatarları Bakı-Sumqayıt marşrutunda istismar olunur. Eyni zamanda “Azərbaycan Dəmir Yolları” QSC-nin sifarişi ilə gələcəkdə Bakı-Tbilisi-Qars marşrutu üzrə hərəkət edəcək qatarlar üçün Azərbaycan tərəfi "Stadler" şirkətinə 30 ədəd yataq tipli vaqon sifariş edib.

Hans Raynhard bəyan edib ki, onun şirkəti Şimal-Cənub dəhlizinin aktivləşdirilməsində çox maraqlıdır.

Qeyd edək ki, “InterRail Holding AG” şirkəti İsveçrənin “Transİnvest” holdinqinə daxildir. Mərkəzi və Şərqi Avropa, Rusiya, Mərkəzi Asiya kimi ərazilərdə əlaqələri olan “TransInvest” şirkəti, 111 fərdi şirkətlərlə dünyanın 34 ölkəsində fəaliyyət göstərir.

“InterRail Holding AG” dəmir yolu ilə yükdaşıma xidmətləri üzrə Avropada və Avrasiya məkanında aparıcı şirkətlərdən biridir. 08D