İpoteka Fondunun müvəkkil bankları ipoteka kreditləşməsini azaldıblar

Azərbaycan İpoteka Fondunun (AİF) müvəkkil bankları 2012-ci ilin sentyabrında ümumi məbləği 3,07 mln manat olan ipoteka kreditləri veriblər. Avqustda bu göstərici 3,24 mln manat olub. Bu, 2011-ci ilin sentyabrındakından 2,5 dəfə azdır. 

AİF-in məlumatına əsasən, hesabat ayında Fond 3,97 mln manat krediti təkrar maliyyələşdirib. İlin əvvəlindən ümumi təkrar maliyyələşmə məbləği 69,5 mln manat təşkil edib. 

2006-cı ilin əvvəlindən Fondun xətti ilə 391, 02 mln manat ipoteka krediti verilib. 9 ayda ipoteka krediti məbləği 45,58 mln manat olub. Bu, 2011-ci ilin yanvar-sentyabr göstəricisindən 33,7% azdır. Kredit alanların 41%-i 18-29 yaşında, 31%-i 30-35, qalan 28%-i 36 yaşdan yuxarı olanlar alıb. 

Dövlət təkcə sosial ipotekaya yardım edir. Bunun üçün hər il 20 mln büdcə vəsaiti ayrılır. Fond bu vəsaiti tam alıb. Kommersiya ipotekası AİF istiqrazlarının buraxılışı hesabına maliyyələşir. 

2009-2012-ci illərdə Fond 55 mln və 75 mln, 60 mln və 20 mln manat olan 4 emissiya yerləşdirib. Ötən ilin dekabrında Fondun 30 mln  sənədsiz, təminatlı, adlı istiqrazları qeydiyyata alınıb. Fond bu emissiyadan 20 mln manat yerləşdirib. 

İpoteka kreditləri Azərbaycan vətəndaşlarına, 50 min manata qədər, 25 ilədək müddətə, illik 8%-dən çox olmamaqla verilir. 

Güzəştli kreditlər 35 min manatadək, 30 ilə qədər müddətə, illik 4%-dək dərəcə ilə verilir. --15В--