Kondisioner idxalı 13,5% artıb

Azərbaycanda məişət kondisionerlərinin istehsalı dayanıb, idxal isə artır.

Şamaxı məişət cihazları zavodu ötən il fəaliyyətini dayandırıb. Orda 1275 ədəd “Elite” markalı kondisioner istehsal edilib. Bir il öncə burda 9,4 min kondisioner istehsal edilmişdi. Müəssisənin anbarlarında 2 min satılmamış məhsul var, deyə Dövlətstatkom məlumat verir. «Bakı Məişət Kondisionerləri» ASC isə bir neçə il öncə fəaliyyətini dayandırıb.

Gömrük Komitəsinin məlumatına görə, 2014-cü ildə xaricdə 33,5 min məişət və sənaye kondisioneri alınıb. Bu, əvvəlki ildəkindən 13,5% çoxdur. Bir kondisioner gömrükdə $340-a rəsmiləşdirilib. Bu, 2013-cü ildəkindən $240, 2012-ci ildəkindən $380 ucuzdur. Azərbaycanda məişət kondisionerləri pərakəndə satışda $350-dan ucuz deyil.

2013-cü və 2014-cü illərdə Azərbaycana kondisionerlər üçün $15 589,3 min və $23 653,6 min məbləğində ehtiyat hissəsləri və komplektlər gətirilib.

Azərbaycana kondisionerlər əsasən Çindən gətirilir. Ötən il bu ölkədən 18,8 min kondisioner idxal edilib. Çin kondisionerləri Azərbaycan sərhədində $105-a rəsmiləşdirilir. Yaponiyadan 104 kondisioner gətirilib. Onların orta qiyməti $1964-dır. 08B