Kooperativlər kənd bələdiyyələrinə kömək edəcək

Bələdiyyələrin problemləri real müstəqilliyin olmaması və fermerlərin mütəşəkkilliyi ilə əlaqədardır. 

Quba rayonunun Timiryazev bələdiyyəsində İqtisadi Tədqiqatlar Mərkəzinin Beynəlxalq Əməkdaşlıq Təşkilatının  (GİZ) dəstəyi ilə keçirdiyi ilk dinləmələr göstərib ki, 3 rübdə kassaya 23 min 718 manat daxil olub. 

 Layihə rəhbəri Qalib Toğrulun sözlərinə görə, kəndlilərin ehtiyacı üçün bu, kiçik məbləğdir. Orada yol çəkilməli, içməli su gətirilməli, kanalizasiya üçün vəsait qalmalıdır. Payız yağışı və ilk qardan sonra kəndi rayon mərkəzi ilə birləşdirən yol təmir edilməlidir. Onun fikrincə, müsbət hal odur ki, gələn il kəndin büdcəsinə 78 min 750 manat daxil olacağı gözlənilir. 

Dinləmələrdə iştirak edən 52-ci Quba dairəsindən deputat Vahid Əhmədov deyib ki, bələdiyyələr çıxış yolunu iməcilikdə görür, Tikinti materialı alıb iş qüvvəsindən pulsuz istifadə etmək olar. Problemi kökündən həll etmək üçün əlavə 15 ha torpaq ayrılıb. Nəticədə kəndlilər daha çox məhsul yetişdirəcək. Məhsulun xaricə aparılmasında gömrük problemini aradan qaldırmaq üçün danışıqlar aparılır. 

 Deputat bələdiyyə təmsilçilərinə təklif edib ki, kooperativ yaratsınlar. Onda hökumət daha həvəslə və böyük həcmdə kredit verər və bir sıra problemləri ölü nöqtədən qaldırmaq olar. --17D—