Maliyyə xidməti istehlakçılarının maliyyə savadlılığının artırılması üzrə layihəyə başlanılıb

Bu gün Bakıda Dünya Bankının «Azərbaycanın maliyyə sektorunun modernləşdirilməsi» layihəsinin «İstehlakçıların hüquqlarının müdafiəsi və maliyyə savadlılığının artırılması» komponentinin başlanmasına həsr edilmiş bir günlük seminar başlayıb. 

Layihəni İsveçrənin Dövlət Katibliyi (SECO) maliyyələşdirir. “AzərPoçt” MMC-nin potensialının artırılması nəzərə alınmaqla layihənin qiyməti $3,1 mln-dur. 

DB-nin Azərbaycan üzrə meneceri larisa Leşenko, SECO-nun regional təmsilçisi Matias Feldman Azərbaycan hökumətinin maliyyə xidməti istehlakçılarının hüquqlarının müdafiəsinə diqqətini yüksək qiymətləndirib. Onların fikrincə, bu layihə maliyyə xidməti istehlakçılarının əminliyini artırmacaq, maliyyə sektoruna etimadı artıracaq. SECO təmsilçisi qeyd edib ki, layihənin uğuru üçün onu təkcə dövlət strukturları yox (AMB, Sığorta Nəzarəti Xidməti), özəl sektor tərəfindən də dəstəklənməlidir. Çünki maliyyə xidməti istehlakçılarının maliyyə savadlılığının artırılması nəticəsində bank və sığorta sektoru inkişaf edəcək. 

Seminarda AMB, Sığorta Nəzarəti Agentliyi təmsilçiləri maliyyə xidməti istehlakçılarının hüquqlarının müdafiəsinə yönəlmiş normativ hüquqi aktlardan (kredit alınması, könüllü və icbari sığorta) danışıblar. Seminarda həmçinin maliyyə xidməti istehlakçılarının hüquqlarının müdafiəsi ilə bağlı beynəlxalq təcrübədən danışılıb. 

Layihə kapital bazarında istehlakçıların hüquqlarının müdafiəsini nəzərdə tutmur, hərçənd bu seqment Azərbaycanda daha zəifdir.