Mərkəzi Bank uçot dərəcəsini 5%-dən 7%-ə qaldırıb

Azərbaycan Mərkəzi Bankının (AMB) qərarı ilə martın 4-dən uçot dərəcəsi 5%-dən 7%-ə qaldırılıb. Qərar makroiqtisadi sabitliyin təmin olunması hədəflərini və pul-maliyyə bazarlarındakı yeni meylləri nəzərə alaraq qəbul edilib.

Eyni zamanda AMB likvidlik əməliyyatları üzrə faiz dəhlizinin yuxarı həddini 17%-dək artırıb. Həmin əməliyyatlar üzrə faiz dəhlizinin aşağı həddi isə dəyişməz olaraq 2% səviyyəsində saxlanılıb.

Banklar qısamüddətli likvidliyin idarə olunması məqsədilə Mərkəzi Bankın çərçivə aləti olan 1-7 günlük repo/əks-repo əməliyyatlarından öz təşəbbüsləri ilə istifadə edə bilər.

Məlumatda deyilir ki, dayanıqlı makroiqtisadi sabitliyin təmin olunması, o cümlədən milli valyutadan yığım vasitəsi kimi daha geniş istifadənin təşviqi, pul-maliyyə bazarlarının inkişafı istiqamətində son vaxtlar ardıcıl tədbirlər görülür. Dövlət qiymətli kağızlarının yüksək gəlirliklə yerləşdirilməsi, milli valyutada qorunan əmanətlər üzrə illik faiz dərəcəsinin yuxarı həddinin isə daha yüksək səviyyədə müəyyən olunması manata etimadın gücləndirilməsinə yönəlib.

“İqtisadi Təşəbbüslərə Yardım” İctimai Birliyinin eksperti Samir Əliyev AMB-nin qərarını şərh edərkən deyib ki, onların sonrakı artımını da istisma etmir. “Uçot dərəcələrinin artırılmasında əsas məqsəd inflyasiyanı və manat aktivləri üzrə gəlirlilik artımını nəzarətdə saxlamaqdır”.Onun fikrincə, ola bilsin ki, AMB dövriyyədə manat kütləsinin artırılmasına hazırlaşır və bununla əlaqədar preventiv tədbir həyata keçirib.--08B--