Metallurgiya sənayesinin həcmi $500 mln-a keçib

2014-cü ildə metallurgiya sənayesi mallarının istehsal həcmi 305,4 mln manat, hazır məhsul 107,6 mln manat olub. Bu isə əvvəlki ildəkindən 11% və 6,2% çoxdur. Ekspertlər hesab edir ki, satışda uçotdan gizlədilən çoxlu qara metallurgiya məhsulu var.

Dövlətstatkoma görə, ötən il polad tökmə həcmi 326,8 min ton olub. Bu, 2013-cü ildəkindən 39% çoxdur. Təkcə “Baku Steel Company”nin illik gücü 1,1 mln tondur. Ötən il zavod gücünü 42% artırıb və bazara armaturdan başqa müxtəlif polad prokatı (katanka şveller və s) təklif edib.

2014-cü ildə armatur istehsalı 2,9% artaraq 248,7 min tona çatıb. Orta aylıq istehsal 20,7 min ton təşkil edib. Ötən il istehsala başlayan Sumqayıt Texnologiya Parkında polad və armatur istehsalının statistik hesabatının olub-olmaması barədə məlumat yoxdur. 2012-ci ildə armatur istehsalı 38,5% artaraq 244,8 min ton olub.

Ötən il polad boru istehsalı 44,5% azalaraq 33,7 min ton təşkil edib. Halbuki ölkədə rəsmən 3 boru zavodu var.

Gömrük Komitəsinin məlumatına görə, ötən il Azərbaycandan $87,6 mln (+4,8%) məbləğində alüminium ixrac edilib. Natura şəklində alüminium istehsalı həcmi açıqlanmır. 08D