Mükafatların 60%-i yeddi aparıcı şirkət toplayıb

Əgər avqustda aparıcı altılıqdan danışılırdısa, indi yeddilikdən danışmaq lazım gəlir. Onlar mükafatların üçdə ikisini toplayıb. 265,71 mln manat mükafatın 164,21 mln-u (61,8%) onların hesabındadır. 

O cümlədən “Paşa Sığorta” – 32,85 mln, “AzSığorta” – 28,66 mln, “AzərSığorta” – 27,14, "Atəşgah" – 23,04, “Paşa həyat Sığorta” – 19,3, “Atəşgah həyat Sığorta” – 18,36 mln, “İpək yolu Sığorta” – 14,85 mln manat toplayıb. “İpək yolu Sığorta” uzun müddət ikinci idi, son 3 ildə geriləyib, avqustdan mövqeyini bərpa edir. 

Mükafatların orta göstəricisi nəzərə alınanda (5,86 mln manat) belə nəticəyə gəlmək olar ki, yeddilik xeyli aralanıb və onlara çatmaq çətindir. Top-7-nin arxasında güclü məmur, klan və ya hökumət resursu dayanır. Perspektivdə onlara keçmiş (Heydər Babayev iqtisadi inkişaf naziri olanda) favorit “Standard Insurance” qoşula bilər. Bu il hakim ailənin himayəsində keçən “Standard” strukturları xeyli canlanıb. 

AMB analitiklərinin birinin sözlərinə görə, “ağırlıq mərkəzi” banklara bağlılıqdan məmurlar və onlara bağlı olanlara keçir. Belə davam etsə, 2017-ci il üçün bazarda 15 iştirakçı qalacaq. 

Ölkədə 43 bank var. Onların az bir hissəsi sığorta şirkəti yarada (cəmi 12) bilib. 

Həyat sığortası bazarı hələ yerli şəraitə uyğun hazırlanmayıb. Bu seqmentdə xərc azdır, ona görə 3 şirkət daxil ola bilib. Dövlət Sığorta Nəzarəti Xidmətinə güclü oyunçulardan ərizə daxil olsa da, onlara baxılmır. 

Deyilənləri təsdiqi üçün ödənişlərə baxaq: “Paşa Sığorta” – 17,54 mln, "Atəşgah" – 9,56, “AzərSığorta” – 8,35 mln və “AzSığorta” – 5,78 mln. Göründüyü kimi, yeddiliyə daxil olan iki life insurance şirkəti (“Paşa həyat Sığorta” və “Atəşgah həyat Sığorta”) ödənişlərdə fərqlənmir. “Atəşgah həyat Sığorta” 2 mln 067,68 min manat kompensasiya edib. Bu, rəqiblərindən 4 dəfə çox, ödəniş üzrə liderlərin göstəricilərindən xeyli azdır. --17D—