Muzdla çalışan işçilərin sayı 16 min nəfər azalıb

Azərbaycanın əmək bazarında çətin izah edilən proseslər baş verir: hökumət I rübdə 29 min yeni iş yeri açıldığını bəyan edir, amma muzdlu işçilərin 16 min nəfər azaldığını gizlədir.

Martın 1-i üçün ölkə iqtisadiyyatında muzdla çalışan işçilərin sayı 1494,1 min nəfər olub. Bu, ilin əvvəlindəkindən 16 min azdır. 1 aprel üçün iqtisadi aktiv əhalinin sayı 4 765,9 min nəfər olub. Bunun 236 mini işsiz sayılır. Dövlətstatkom qalanlarının məşğul olduğunu bildirir.    

Əmək və vergi qanunvericiliyinə nəzarət edən strukturlar iş yerlərinin leqallaşdırılması barədə məlumat verirlər. Bu ilin I rübündə Əmək və Əhalinin Sosial Müdafiəsi Nazirliyi 2951 qeyri-leqalla əmək müqaviləsi bağlanmasını təmin edib. Vergilər Nazirliyi isə müqaviləsiz fəaliyyət üzrə 2 178 fakt aşkarlayıb.

Bu ilin 2 ayında dövlət bölməsində işçi sayı (989,1 min nəfər) 2,1 min nəfər, qeyri-dövlət bölməsində (596 min nəfər) 13,9 min nəfər azalıb.

Azərbaycanda iş yerlərinin sayı fiziki şəxslərin hesabına artıb. İlin əvvəlindən Vergilər Nazirliyi fiziki şəxs statuslu 22 min sahibkarlıq subyekti qeydiyyata alıb. Onların nə qədərinin vergi ödədiyi barədə məlumat verilmir.   08D