Naxçıvanın inkişafı proqramlaşdırılıb

 "2014-2018-cü illərdə Naxçıvan Muxtar Respublikasının sosial-iqtisadi inkişafı üzrə Dövlət Proqramı" Naxçıvan MR Ali Məclisinin sədri Vasif Talıbov tərəfindən təsdiq edilib.

Sənədə əsasən, ötən 10 ildə ÜDM istehsalı həcmi 13,9 dəfə, sənaye istehsalı 49 dəfə, kənd təsərrüfatı məhsulları istehsalı 4,7 dəfə, investisiya qoyuluşu 16,4 dəfə, xarici ticarət dövriyyəsi 13,9 dəfə, əhalinin gəlirləri 10,2 dəfə, orta aylıq əmək haqqı 9,8 dəfə artıb. 420 min qeydiyyatda olan əhali üçün 58 min yeni iş yeri açılıb.

Əslində mənzərə tamam başqadır. Yerli hüquq müdafiəçilərinə görə, NMR-da 200 min nəfər yaşayır. Bu il muxtariyyatın büdcəsi 350,5 mln manat olub. Bunun 19,1%-i və ya 60,8 mln manat yerli resurslar hesabına təmin edilib.

NMR hökuməti investisiya layihələrinin icrası üçün mərkəzdən böyük vəsaitlər alır. Maliyyə Nazirliyinin məlumatına görə, 2013-cü ildə bu göstərici 262,5 mln manat olub. Bu il üçün məlumat yoxdur. «Milli Büdcə Qrupu» QHT Koalisiyası bildirir ki, 2008-2011-cü illərdə NMR  hökuməti dövlət büdcəsindən  investisiya layihələri üçün 180 mln manat alıb.

Ölkənin başqa regionlarından fərqli olaraq, NMR-da dövlət büdcəsinin xərclərinə nəzarət edilmir. Podratçı seçimi üçün tender keçirilmir. Dövlət investisiya layihələrinin əsas podratçısı Vasif Talıbova bağlı strukturlardır (“Gəmiqaya Holding”, “Dizayn Holding” və s). --17D—