Neft sektoru sənayeni aşağı sürükləyir

Bu ilin yanvar-aprelində ölkədə sənaye istehsalı həcmi 11 mlrd manat olub. Bu, ötən ilin eyni dövründəkindən 2% azdır. Dördüncü aydır, sənaye istehsalı həcmi neft sektorunda tempin azalması ilə bağlı geriləyir.

Neft və qaz hasilatı ilin əvvəlindən 1,5% azalıb. Bu dövrdə 14 mln ton neft və qaz kondensatı hasil edilib. Bu,  ötən ilin eyni dövründəkindən 1,7% azdır.

 “Anglo-Asian Mining Company” qızıl hasilatı şirkətinin işi pis getmir. Bu il çıxarılan qızıl (501,8 kq) ötən ilin eyni dövründəkindən 46,4% çoxdur.

Neft eamlı zavodlarının fəaliyyətinin qismən dayanması emal sənayesi məhsulunun həcminə də təsir edib. Neft emalı həcmi (778 mln manat) 13,3% azalıb.

Dövlətstatkoma görə, qeyri-neft emal sənayesində istehsal 4,2% artıb. Emal sənayesinin ümumi həcmi 2,3 mlrd manat olub (3,2%). Bunun 35%-i (820 mln manat) yeyinti sənayesinin payına düşür. İçki istehaslı (44 mln manat və ya mənfi 7,9%), kağız və karton (7,3 mln manat və ya mənfi 11%), rezin-plastmass məmulatı (12 mln manat və ya mənfi 31%) istehsalı azalıb.

DSK-ya görə, ötən dövrdə sənayeyə  2 267 mln manat investisiya qoyulub. Bu, ötən ilin eyni dövründəkindən 12,7% çoxdur. İnvestisiyaların çoxu (1,8 mlrd manat) neft sektoruna yönəldilib. Emal sahəsinə 134,2 mln manat əsaslı qoyuluş olub. Bu, ötən ilin eyni dövründəkindən 48,1% azdır.

Bu il ölkədə «sənaye ili» elan edilib. Bu sahədə görüləcək tədbirlərlə bağlı xüsusi plan təsdiq edilib. 08D