Noyabrda kreditləşmə artsa da, verilən ipoteka krediti həcmi il ərzində 30% azalıb

Azərbaycan İpoteka Fondunun (AİF) müvəkkil bankları 2012-ci ilin noyabrında ümumi məbləği 10,38  mln manat olan ipoteka kreditləri veriblər. Oktyabrda bu göstərici 4,48 mln manat olub. 

AİF-in məlumatına əsasən, hesabat ayında Fond 10,74 mln manat krediti təkrar maliyyələşdirib. İlin əvvəlindən ümumi təkrar maliyyələşmə məbləği 85,42 mln manat təşkil edib. 

2006-cı ilin əvvəlindən Fondun xətti ilə 405,88 mln manat ipoteka krediti verilib. 11 ayda 60,44 mln manat kredit verilib. Bu, 2011-ci ilin yanvar-oktyabr  göstəricisindən 32,7% azdır. Kredit alanların 41%-i 18-29 yaşında, 31%-i 30-35, qalan 28%-i 36 yaşdan yuxarı olanlar alıb.  

Dövlət təkcə sosial ipotekaya yardım edir. Bunun üçün hər il 20 mln büdcə vəsaiti ayrılır. Fond bu vəsaiti tam alıb. 2013-cü ilin bdcəsində sosial ipotekaya 2 dəfə çox vəsait ayrılıb. Kommersiya ipotekası AİF istiqrazlarının buraxılışı hesabına maliyyələşir. 

2009-2012-ci illərdə Fond 55 mln və 75 mln, 60 mln və 20 mln manat olan 4 emissiya yerləşdirib. Ötən ilin dekabrında Fondun 30 mln  sənədsiz, təminatlı, adlı istiqrazları qeydiyyata alınıb. Fond bu emissiyadan 20 mln manat yerləşdirib. Sonuncu yerləşdirmə iyunun ortalarında olub. 5 mln manat məbləğində növbəti partiya bazar ertəsi satışa çıxarılacaq. 

İpoteka kreditləri Azərbaycan vətəndaşlarına, 50 min manata qədər, 25 ilədək müddətə, illik 8%-dən çox olmamaqla verilir. 

Güzəştli kreditlər 35 min manatadək, 30 ilə qədər müddətə, illik 4%-dək dərəcə ilə verilir. --15В--