Redaktor ittihamları əsassız sayır

Bu günlərdə Bakı Ağır Cinayətlər Məhkəməsində “Xural” qəzetinin baş redaktoru Əvəz Zeynallının məhkəmə prosesi davam edib. 

Ə.Zeynallı əvvəlcə zərərçəkən, sonradan isə şahid kimi ifadə verən sabiq deputat Gülər Əhmədovanın məhkəmə prosesində iştirakının təmin olunmamasına iradını bildirib. Müttəhim hakimi və dövlət ittihamçısını G.Əhmədovanı məhkəməyə gətirməyi bacarmamaqda ittiham edib. 

Prokurorun “Kurort” ASC və “İnturAvto” şirkətlərindən rüşvət alıb-almaması sualına Ə.Zeynallı sərt cavab verib. Redaktorun yalan ittihamlar, əsaslar üzərində həbsinə bais olanları lənətləməsini prokuror təhqir kimi dəyərləndirib.  

Daha sonra ürəyinin ağrımasını bəhanə gətirən ittihamçı hakimdən fasilə elan etməsini istəyib. Ə.Zeynallı isə cinayət-prosessual məcəlləni həbs qəfəsinə çırparaq, prokurora “bunu sizlər yazmısınız, heç olmasa qəbul etdiyiniz qanunlara riayət edin”, - deyə prokurora etiraz mövqeyini ifadə edib. 

Fasilədən sonra Ə.Zeynallı prokuroru cianyət işilə yaxından tanış olmamaqda, ittiham tərəfi bəzi xüsusatları nəzərə almamaqda ittiham edib. Redaktor Arif Heydərov adlı şəxsdən rüşvət alması sualına “Aydın Heydərovdan rüşvət alanın da, mənə şər atanın da...” cavabı verib. Ə.Zeynallı «Azərbaycan» nəşriyyatının direktoru Ağabəy Əsgərov və Milli Dövlətçilik Partiyasının sədri Sabir Tanrıverdiyevlə və vergidən yayınma ilə bağlı epizodlar üzrə  ittihamları qəbul etmədiyini söyləyib. 

Məhkəmə prosesi dekabrın 12-si saat 14.00-ə kimi təxirə salınıb.

Ə.Zeynallı adı korrupsiya faktında hallanan,  hazırda barəsində Cinayət Məcəlləsinin 178-ci maddəsilə cinayət işi qaldırılan keçmiş deputat G.Əhmədovanın əsassız rüşvət ittihanları ilə həbsə alınıb, 14 aydır ki, baş redaktor əsassız olaraq həbsdədir. -05D-