Noyabrın 1-dək kimə nə qədər kredit verilib?

Noyabrın 1-dək vaxtı keçmiş kredit ödənişlərinin ümumi həcmi 943,4 mln manat (ilin əvvəlinə nisbətən +19%) və ya bütün kreditlərin 5,3%-i qədər olub. 

AMB-nin məlumatına görə, 2014-cü il noyabrın 1-nə banklar və bank olmayan kredit təşkilatları tərəfindən Azərbaycan iqtisadiyyatına kredit qoyuluşları 17 mlrd 841,5 mln manat təşkil edib (+15,7%). Bu isə vaxtı keçmiş kreditlərin daha sürətlə artdığını göstərir. 

Noyabrın 1-nə dövlət payına malik olan bank tərəfindən 6 mlrd 65,3 mln. manat (artım 14,4%) və ya bütün kreditlərin 34%-i, özəl banklar tərəfindən 11 mlrd 251 mln. manat (artım 16,1%) və ya bütün kreditlərin 63,1%-i həcmində kredit verilib. Qalan 2,9% bank olmayan kredit təşkilatlarının payına düşür.

Noyabrın əvvəlinə verilmiş kreditlərin 13 mlrd 160,7 mln manatı (artım 18,8%) milli valyuta, 4 mlrd 680,8 mln manatı (artım 7,7%) xarici valyuta ilə verilib.

Manat kütləsinin, demək, istehlak kreditlərinin artımı aşkar görünür.

Bankların kredit qoyuluşlarının strukturunda 7 mlrd 383,8 mln manat (41,4%) istehlak kreditləridir. 2 mlrd 461,6 mln manat (13,8%) tikinti və daşınmaz əmlak sahələrinin, 2 mlrd 78,3 mln manat (11,6%) sənaye və istehsal sektorunun, 2 mlrd 540,7 mln. manat (bütün kreditlərin 14,2%-i) ticarət və xidmət sahələrinin, 817,7 mln manat (4,6%) kənd təsərrüfatı və emal sahələrinin, 569,1 mln manat (3,2%) nəqliyyat və rabitə sahələrinin, 220,6 mln manat (1,2%) energetika, kimya və təbii ehtiyatlar sektorunun, qalan məbləğ isə digər sektorların payına düşüb. --17D—