Oğuz-Qəbələ-Bakı su kəmərinin keçdiyi ərazidəki torpaq sahibləri hələ də kompensasiya almayıblar

Torpaq sahəsi Oğuz-Qəbələ-Bakı su kəmərinin keçdiyi ərazidə olan 3 257 sahibkara dəyən ziyanın ödənilməsi və kompensasiya verilməsinə məsul olan dövlət struktruları öz vəzifəsini icra etmir. Bu barədə Reportyorların Azadlığı və Təhlükəsizliyi İnstitutunun mətbuat mərkəzində mətbuat konfransı zamanı Neftçilərin Hüquqlarını Müdafiə Komitəsinin sədri Mirvari Qəhrəmanlı bildirib. Səkkiz rayonunn ərazisindən keçən kəmərin tikintisinə 2007-ci ildə başlanılıb və 2 il əvvəl başa çatıb. 

Qəhrəmanlı qeyd edib ki, layihənin tikintisinin sifarişçisi olan “Azərsu” ASC torpaq sahiblərinə dəyən ziyanın ödənilməsi barədə sorğulara cavab vermir. Maliyyə Nazirliyi isə bildirir ki, kompensasiya verilməsi barədə sənədlər “Azərsu” ASC tərəfindən təqdim edilməyib. Hüquqşünas Azər Quliyev qeyd edib ki, “Azərsu” “Dövlət ehtiyacları üçün torpaq alınması haqqında” qanunda nəzərdə tutulanları icra etmir. «Sifarişçi torpaq sahiblərini xəbərdar etməli, torpağın özgəninkiləşdirilməsindən onların itkisini qiymətləndirməlidir», deyə o bildirib. 

Mətbuat konfransında qeyd edilib ki, vəkillərin səyi nəticəsində kompensasiya ödənilməsi barədə iki işi udmaq mümkün  olub. Növbədə daha bir neçə iş var. Eyni zamanda, vurğulanıb ki, ölkə vətəndaşları Neft Fonduna 780 mln manata başa gələn bu layihədən əziyyət çəkməməlidirlər. 

Layihənin ekoloji və sosial aspektlərindən danışan Qəhrəmanlı qeyd edib ki, araşdırma zamanı təkcə Oğuzda 25 bulaq və bir neçə artezianın quruması müəyyən edilib. Bundan başqa, onda olan informasiyaya görə, Oğuzdan Bakıya gələn sudan kommersiya məqsədi üçün istifadə edilir və özəl şirklətlərin biri onu Türkmənistana satır. 08C