Özəlləşdirmə zəifləyib

2012-ci ildə Azərbaycanda  (Naxçıvan MR nəzərə alınmadan) 600 kiçik müəssisə və obyekt, o cümlədən avtonəqliyyat vasitəsi özəlləşdirilib. Bu, 2011-ci  ildəkindən (897) 30% azdır. 

Əmlak Məsələləri Dövlət Komitəsinin ötən ilin yekununa həsr edilmiş kollegiyasında qeyd edilib ki, 2012-ci ildə özəlləşdirilən müəssisə və obyektlərin altındakı torpaqların özəlləşdirilməsi sürətlənib. Cəmi 620 torpaq sahəsi satılıb. Ötən il bu göstərici 540 idi. 

ƏMDK press-relizində qeyd edilir ki, 53 pul və ixtisaslaşdırılmış pul hərracında 32 səhmdar cəmiyyətin səhmləri satılıb. İnvestisiya müsabiqəsi metodu ilə özəlləşdirilən müəssisələr barədə məlumat verilmir. Bildirilir ki, investisiya müsabiqəsi vasitəsilə özəlləşdirilmiş müəssisələrə 2012-ci  il ərzində müqavilələr üzrə müsabiqə qalibləri tərəfindən 160 milyon manata yaxın məbləğdə investisiya qoyulub. 

Bu ilin əvvəli üçün ƏMDK-nin sərəncamında 95 dövlət müəssisəsi var. Dövlət mülkiyyətində 313 SC-nin səhmləri var. ƏMDK-nin məlumatına görə 6000-ə yaxın müəssisə və təşkilatlar dövlət mülkiyyətinə aiddir. 

ƏMDK 2013-cü ilin əvvəli üçün dövlət mülkiyyətində olan 27 119 torpaq sahəsinə nəzarət edir. Bu obyektlərin altında 113 527,65 ha torpaq var. Bu torpaq sahələrində yerləşən daşınmaz əmlak obyektləri barədə elektron kadastr məlumat bazası yaradılıb və kadastr planları tərtib edilib. Həmin torpaq sahələrindən 16930-u  (83925.32 hektar)  barədə tərtib olunmuş kadastr planlarından çıxarışlar  hazırlanıb. 08D