Parlament icbari tibbi sığortanı canlandırmaq istəyir

2014 Mart 06 (Cümə axşamı) 13:02:59

«İcbari tibbi sığorta haqqında» qanun yaz sessiyasında Milli Məclisdə müzakirə ediləcək. MM-in iqtisadi siyasət komitəsində Turan-a deyiblər ki, sənəd müzakirə üçün hazırdır.

Parlament komitəsinin üzvləri İTS üçün xüsusi ehtiyat fondunun yaradılmasını təklif edirlər.  Seqmentin 3 iştirakçısının olması nəzərdə tutulur – işəgötürən, sığorta şirkəti və icraçı (tibb müəssisəsi). Düzəlişlər İTS-in hər iştirakçısı üçün qanunun tələbini pozmağa görə sanksiyalar da nəzərdə tutur. Turan-ın qeydi  – sığorta edilən vətəndaş prosesin bərabərhüquqlu iştirakçısı olmalıdır.

Xatırladaq ki, bir qədər əvvəl hökumət qanunun 2015-ci ildən tətbiq ediləcəyinə ümid etdiyini bildirdi. Maliyyə Nazirliyi ideyaların reallaşdırılmasına vəsait ayırır, ancaq Nazirlər Kabinetin yanında ixtisaslaşdırılmış agentlik hər dəfə təşkilatı və məmur maneələri ilə üzləşir.

Ekspertlərin fikrincə, Səhiyyə Nazirliyinə icbari tibbi sığorta ona görə sərf etmir ki, onun tətbiqi ilə büdcə vəsaitləri məmurların sərəncamına verilməyəcək və sığorta polislərinə ayrılacaq. 2014-cü ilin büdcəsində səhiyyəyə 725,5 mln manat ayrılıb.

Ekspertlərin hesablamasına görə, yerli əhali orta hesabla gəlirlərinin 15%-i müalicə və profilaktikaya xərcləyir. Dövlət Statistika Komitəsinin məlumatına görə, ötən il Azərbaycan vətəndaşlarının ümumi gəlirləri 37,6 mlrd manat təşkil edib, yəni xarici klinikalarda da müalicə daxil olmaqla səhiyyəyə 5,5-5,7 mlrd manat xərclənib. --17D-