Paşa Bank aparıcı İsveçrə bankı ilə əməkdaşlıq elan edir

Azərbaycanın aparıcı korporativ banklarından olan Paşa Bankın fərdi bankçılıq sahəsində İsveçrənin aparıcı banklarından biri olan Banque Cantonale de Genève (BCGE) bankı ilə apardığı danışıqları uğurla yekunlaşdırıb. 

 Bankdan verilən məlumata görə, Paşa Bankın Azərbaycandakı korporativ və fərdi müştəriləri Bank tərəfindən BCGE bankına təqdim olunmaqla onun maliyyə məhsulları və xidmətindən faydalana biləcək.

"Hadisələrin inkişafından mənunuq. Biz, Banque Cantonale de Genève-dən çox şey öyrənə bilərik və Azərbaycandakı müştərilərimizə göstərilən xidmətlər sahəsində onlarla əməkdaşlığa böyük önəm veririk. PAŞA Bank öz beynəlxalq şəbəkəsini uğurla qurmağa davam edir və biz bu yaxınlarda Gürcüstanda öz nümayəndəliyimiz açmışıq. Beynəlxalq miqyasda inkişaf strategiyamızın çərçivəsində biz yaxın gələcəkdə Cenevrədə öz fəaliyyətimizi təşkil etməyi nəzərdə tutmuşuq və BCGE kimi nüfuzlu banklar ilə əməkdaşlıq bizim üçün böyük əhəmiyyət təşkil edir", - PAŞA Bankın İdarə Heyətinin sədri Fərid Axundov deyib.

"İsveçrə və Azərbaycan arasında işgüzar münasibətlərin artmasını nəzərə alaraq, biz, Azərbaycan iqtisadiyyatının inkişafında çox maraqlıyıq. Bizim Paşa Bank ilə əməkdaşlığımız əlimizi Qafqazın nəbzində tutmağa və qarşılıqlı səmərəli əlaqələr yaratmağa imkan verir", - "Banque Cantonale de Genève" bankının baş icraçı direktoru Blez Qoetşin bildirib.

 Paşa Bankın fərdi müştərilərinin investisiya və fidusiar əmanət hesabları üçün və İsveçrə banklarının digər fərdi bankçılıq üzrə xidmətlərindən istifadə edilməsi üçün müraciət etmə imkanı Azərbaycan Respublikasının qanunvericiliyinə, o cümlədən "Valyuta Tənzimli haqqında" qanuna və Azərbaycan Respublikası Mərkəzi Bankı tərəfindən qəbul edilmiş "Azərbaycan Respublikasında rezident və qeyri-rezident valyuta əməliyyatlarının rejimi haqqında Qaydalar"a tam uyğundur.

Paşa Bank Azərbaycanda aparıcı korporativ banklardan biridir. 2007-ci ildə yaradılmış bu bank kreditlər, qiymətli kağızlar, fərdi bankçılıq, cari hesablar, nağd vəsaitlərin idarə edilməsi və xəzinədarlıq xidmətləri daxil olmaqla bir sıra korporativ bankçılıq xidmətləri göstərir.

PAŞA Bankın baş ofisində və dörd filialında təxminən 170 nəfər işçi fəaliyyət göstərir və o, 2012-ci ildə EMEA Finance beynəlxalq maliyyə jurnalı tərəfindən "Azərbaycanın Ən Yaxşı İnvestisiya Bankı" elan edilib.

Sentyabr ayında "Standard & Poor's" Beynəlxalq Reytinq Xidmətləri Təşkilatı PAŞA Banka "BB-"uzunmüddətli və "B" qısamüddətli (sabit perspektiv ilə) kredit reytinqləri verib Bu, 100% yerli kapitala malik Azərbaycan kommersiya Bankı üçün təyin edilmiş ən yüksək və Azərbaycandakı özəl bank üçün ikinci ən böyük reytinq dərəcəsidir.

PAŞA Bank sığorta, əmlak tikintisi, tikinti materiallarının istehsalı, turizm və digər biznes sahələrində əhəmiyyətli aktivlərə malik, Azərbaycandakı iri investisiya holdinq qrupu olan PAŞA Qrupun bir hissəsidir. Azərbaycanda pərakəndə bankçılıq üzrə fəaliyyət göstərən ən böyük banklardan biri olan Kapital Bank da PAŞA Qrupuna məxsusdur. 

Banque Cantonale de Genève 1816-cı ildən fəaliyyət göstərir. Fərdi müştərilərə, korporasiya və təşkilatlara yüksək səviyyəli xidmət göstərir - adi bank xidməti, varlı fiziki şəxslərə bank xidməti, aktivlərin idarə edilməsi, pensiya planlaşdırılması və s. ilə məşğuldur. Bankda həmçinin qiymətli kağızlarla əməliyyatlar keçirlir, yeni maliyyə-kredit alətləri hazırlanır. İsveçrədən kənarda bank Fransa, Dubay və Honkonqda işləyir. Bankda 700 əməkdaş var və o, SIX Swiss Exchange İsveçrə birjasında qeydiyyata alınıb. –15D—