Paşa Bank və British Council-un birgə layihəsi çərçivəsində biznes-jurnalistikanın inkişafı üzrə təlimlərə start verilib

Azərbaycanın ən iri banklarından olan Paşa Bank "British Council" ilə əməkdaşlıq əsasında yerli biznes-jurnalistikanın inkişafına həsr olunmuş proqramın həyata keçirilməsi çərçivəsində növbəti mərhələnin başlandığını elan edir. Layihə yerli Kütləvi İnformasiya Vasitələrinin əsasən iqtisadi mövzularda yazan işçilərinin peşə qabiliyyəti və bacarıqlarının mükəmməlləşdirilməsinə yönəlib. 

Bankın İdarə Heyətinin Sədri Fərid Axundov bildirib ki, belə tədbirlərin keçirilməsi Paşa Bankın Sosial məsuliyyət proqramının mühüm tərkib hissəsini təşkil edir. "Biznes şəffaflığı və açıq cəmiyyət siyasətinə uyğun olaraq, Bankımız Azərbaycanın iqtisadi mövzularda yazan jurnalistlərinin yüksək səviyyəli biliklərə yiyələnməsində və əcnəbi həmkarlarıyla bilavasitə təcrübə mübadiləsi imkanı əldə etməsində maraqlıdır. Bu baxımdan, Paşa Bankın "British Council"-dan olan həmkarlarımızla birgə gerçəkləşdirdiyi proqram sadaladığım məqsədlərə çatmaq üçün əla vasitədir. Əminəm ki, Azərbaycan biznes-jurnalistikasının inkişafı üzrə ötənilki layihənin yekunları kimi, bu layihənin də nəticələri uğurlu olacaq", - deyə F.Axundov bildirib. 

Tədris proqramı xaricdən olan peşəkar təlimatçı-müəllimlərin rəhbərliyi altında bir neçə xüsusi media-kursundan və yerli KİV nümayəndələrinin Böyük Britaniyaya tanışlıq səfərindən ibarətdir. Səfər əsnasında Azərbaycan mətbuat və media işçilərinin Böyük Britaniyanın aparıcı qəzet, jurnal və digər KİV jurnalistləri ilə görüşləri və təcrübə mübadiləsi nəzərdə tutulub. 

Layihənin başlıca məqsədi iqtisadi mövzuları işıqlandıran aparıcı jurnalist qrupunun yaradılmasıdır; onlar avropalı həmkarlarının çoxillik təcrübəsilə tanış olmaqla, yiyələndikləri bacarıqlardan ölkədə baş verən iqtisadi dəyişikliklər və müxtəlif biznes prosesləri barədə daha peşəkar məlumatların verilməsində və həmin dəyişikliklərin və proseslərin təhlilində istifadə edə biləcəklər. 

Kollektiv qərara əsasən, Paşa Bank və British Council-un sözügedən layihəsində iştirak etmək üçün AzərTac, ANS TV, Azadlıq radio, Exo, 1 news, AzTV, İTV, Turan, ANN, Trend, Kaspi kimi aparıcı çap və elektron KİV, həmçinin radio və televiziyanı təmsil edən 11 jurnalist seçilib. –15D--